मुंबई : पंतप्रधान नरेंद्र मोदी येत्या १९ तारखेला मुंबई दौऱ्यावर येणार आहेत. विविध विकासकामांच्या भूमीपूजनासाठी नरेंद्र मोदी एकदिवसीय मुंबई दौऱ्यावर असतील. त्यांच्या स्वागताला शहरातील विविध चौकाचौकात बॅनरबाजी पाहायला मिळतीये. पंतप्रधान मोदींबरोबरच शिवसेनाप्रमुख बाळासाहेब ठाकरे, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचे कटआऊट्स पाहायला मिळत आहेत. शिवसेना भवनासमोरील देखील मुख्यमंत्री शिंदेंचे मोठमोठाले बॅनर्स लागलेले होते. परंतु या बॅनर्समुळे वादविवाद होऊ नयेत, या कारणास्तव पोलिसांनी हे बॅनर हटवले आहेत.
महाराष्ट्रातल्या सत्तासंघर्षाचं प्रकरण सुप्रीम कोर्टात असताना आणि आज त्याच्यासंबंधी महत्त्वाची सुनावणी असताना राज्यातलं राजकीय वातावरण चांगलंच गरम झालंय. अशावेळी ठाकरे आणि शिंदे गटात आणखी मोठा वाद हो नये, तणावाचं वातावरण राहू नये, याची काळजी मुंबई पोलीस घेताना दिसून येत आहेत.
शिवसेना भवनासमोरील एकनाथ शिंदे यांचा बॅनर हटवला
सेनाभवनासमोर लावलेलं मुख्यमंत्री एकनाथ शिंदे यांचं पोस्टर पोलिसांनी काढलं. पंतप्रधान नरेंद्र मोदी यांच्या स्वागतासाठी ठिकठिकाणी पोस्टर्स लावण्यात आले आहेत. सेनाभवन समोर देखील पोस्टर लावण्यात आलं होतं. यामुळे वाद निर्माण होऊन कायदा सुव्यवस्थेचा प्रश्न निर्माण होऊ शकतो. या कारणास्तव हे पोस्टर्स पोलिसांनी हटवले.
पंतप्रधान नरेंद्र मोदींचा मुंबई दौरा कसा असणार आहे?
- १९ जानेवारी रोजी पावणे पाच वाजता पंतप्रधान मोदी यांचं मुंबई विमानतळावर आगमन
- ५ ते ६.१० वाजता एमएमआरडीए लोकार्पण, भूमीपूजन सोहळा
- ६.३० वाजता अंधेरीतील गुंदवली मेट्रो स्टेशनवर पंतप्रधान मोदी यांचं आगमन
- ६.३० वाजता मेट्रोचं उद्घाटन आणि मेट्रोतून प्रवास करणार
- ७.१५ वाजता पुन्हा राजधानी नवी दिल्लीकडे रवाना
Source: https://news.google.com/__i/rss/rd/articles/CBMitgFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL2NtLWVrbmF0aC1zaGluZGUtZmxleC1wbGFjZWQtaW4tZnJvbnQtb2Ytc2VuYS1iaGF2YW4tdG8td2VsY29tZS1wbS1tb2RpLXdhcy1yZW1vdmVkLWJ5LXRoZS1tdW1iYWktcG9saWNlL2FydGljbGVzaG93Lzk3MDYwNDkzLmNtc9IBugFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL2NtLWVrbmF0aC1zaGluZGUtZmxleC1wbGFjZWQtaW4tZnJvbnQtb2Ytc2VuYS1iaGF2YW4tdG8td2VsY29tZS1wbS1tb2RpLXdhcy1yZW1vdmVkLWJ5LXRoZS1tdW1iYWktcG9saWNlL2FtcF9hcnRpY2xlc2hvdy85NzA2MDQ5My5jbXM?oc=5