Loudspeaker Row मोठी बातमी: मुंबईत ८०३ मशिदींवरील भोंग्यांना पोलीस परवानगी मिळाली, पण… – Maharashtra Times

मुंबई: मशिदींवरील भोंग्यांवरून राज्यात राजकारण तापलं असतानाच भोंगे हटवले जाऊ नयेत यासाठी मशिदींच्या व्यवस्थापकांनी पोलिसांकडे धाव घेतली आहे. मुंबईतील १ हजार १४४ मशिदींपैकी आतापर्यंत ८०३ मशिदींनी भोंगे लावण्यासाठी पोलिसांकडून रितसर परवानगी घेतल्याची माहिती हाती आली आहे. सर्वोच्च न्यायालयाच्या आदेशाचे पालन करण्याच्या अटीवर मुंबई पोलिसांकडून ही परवानगी देण्यात आली आहे. ( Loudspeaker Row Mumbai Latest News )

वाचा :मनसेवर कारवाई; मुंबईत विभागाध्यक्षाला अटक, राज यांच्यावर गुन्हा दाखल होताच…

मशिदींवरील भोंगे हटवण्याची मागणी करत राज ठाकरे यांनी आक्रमक पवित्रा घेतला आहे. हे भोंगे हटवले नाही तर मशिदींसमोर भोंगे लावून त्यावर दुप्पट आवाजात हनुमान चालीसा लावण्याचा इशारा राज यांनी दिला आहे. त्यासाठी राज्य सरकारला त्यांनी अल्टिमेटमही दिला आहे. त्यामुळे राज्यात वातावरण तापलं असताना मशिदींकडून भोंगे वाचवण्यासाठी प्रयत्न केले जात आहेत. मुंबईतील बहुतांश मशिदींनी भोंग्यांसाठी पोलिसांकडून परवानगी प्राप्त केली आहे. मुंबईत १ हजार १४४ अधिकृत मशिदी असून आतापर्यंत त्यापैकी ८०३ मशिदींनी भोंगे लावण्याची परवानगी घेतली आहे. सकाळी ६ ते रात्री १० या वेळेत लाऊडस्पीकरचा वापर केला जाईल व डेसिबलची मर्यादा पाळली जाईल, या प्रमुख अटींवर ही परवानगी देण्यात आली आहे, असे मुंबई पोलिसांकडून सांगण्यात आले.

वाचा : राज ठाकरेंवर गुन्हा दाखल, पोलीस नोटीस घेऊन राज ठाकरेंच्या घरी जाण्याची शक्यता

राज ठाकरे यांच्यावर कारवाईची शक्यता

औरंगाबादच्या सभेत राज ठाकरे यांनी मशिदींवरील भोंग्यांवरून चिथावणी देणारे भाषण केले होते. याची पोलिसांकडून गंभीर दखल घेण्यात आली असून कायदा आणि सुव्यवस्था राखण्यासाठी पावले उचलण्यात येत आहेत. राज यांच्याविरुद्ध औरंगाबाद येथे गुन्हा दाखल करण्यात आला असून राज्यात अन्य ठिकाणीही मनसे पदाधिकारी व नेत्यांवर प्रतिबंधात्मक कारवाई करण्यात येत आहे. राज यांच्या अटकेची शक्यता व्यक्त करण्यात येत असताना मनसेचे अनेक नेते भूमिगत झाल्याचेही सांगण्यात येत आहे. राज हे स्वत: औरंगाबाद येथे जाऊन पोलिसांपुढे हजर होतील, अशीही चर्चा आहे.

वाचा : भोंग्याविरोधात लढाई, भोंग्याच्या आवाजामुळे गुन्हा, राज ठाकरेंवर तीन कलमं, मनसे म्हणते, अटकेसाठी तयार!