मुंबई बातम्या

मुंबईतील लोकल ट्रेनमध्येही हनुमान चालीसा फिव्हर, पाहा नेमकं काय घडलं? – Maharashtra Times

मुंबई: महाराष्ट्र नवनिर्माण सेनेने मशिदींवरील भोंग्यासंदर्भात घेतलेल्या आक्रमक भूमिकेमुळे सध्या मुंबईसह राज्यभरातील वातावरण तापले आहे. ज्या मशिदींमध्ये भोंग्यावरून अजान केली जाईल, त्या मशिदींच्याबाहेर लाऊडस्पीकर्स (Loudspeakers on mosque) नेऊन दुप्पट आवाजात हनुमान चालीसा (Hanuman Chalisa) लावा, असे आदेश राज ठाकरे यांनी मनसेच्या (MNS) कार्यकर्त्यांना दिले आहेत. राज्य सरकार आणि पोलिसांनी कारवाईचा इशारा दिल्यानंतरही राज ठाकरे (Raj Thackeray) यांनी जाहीर पत्र लिहून मशिदींवरील भोंग्यांविरोधात आक्रमक होण्याचे आदेश कार्यकर्त्यांना दिले होते. त्यामुळे मुंबईत सध्या भोंगा विरुद्ध हनुमान चालीसा, असे वातावरण पाहायला मिळत आहे.

मुंबईची लाईफलाईन समजल्या जाणाऱ्या लोकल ट्रेनमध्येही या आंदोलनाचा इफेक्ट दिसत आहे. सध्या सोशल मीडियावर लोकल ट्रेनमध्ये होत असलेल्या हनुमान चालीसा पठणाचा व्हिडिओ व्हायरल होत आहे. एरवी मुंबईतील लोकल ट्रेनमध्ये चालणारी भजनं ही नवीन बाब नाही. गेल्या अनेक वर्षांपासून लोकलमध्ये ही भजनी परंपरा सुरु आहे. यामध्ये आता हनुमान चालीसेची भर पडली आहे.

हार्बर मार्गावरील लोकल सेवा विस्कळीत

मुंबईत बुधवारी हार्बर आणि मध्य रेल्वे मार्गावरील वाहतूक उशीराने सुरु होती. तांत्रिक बिघाडामुळे या दोन्ही मार्गांवरील गाड्या १५ ते २० मिनिट उशिराने धावत आहेत. त्यामुळे सकाळच्या वेळेत कार्यालयात जाण्यासाठी निघालेल्या चाकरमन्यांना चांगलाच मनस्ताप सहन करावा लागत आहे.

राज ठाकरेंच्या इशाऱ्यानंतर मुंबईत कडेकोट बंदोबस्त

राज ठाकरे यांनी मनसैनिकांना मशिदींबाहेर हनुमान चालीसा पठण करण्याचा आदेश दिल्यानंतर मुंबई पोलिसांकडून शहरातील सुरक्षाव्यवस्थेत वाढ करण्यात आली आहे. मुंबईतील जवळपास प्रत्येक मशिदीबाहेर पोलिसांचा कडेकोट बंदोबस्त दिसत आहे. मशिदींच्या परिसरात पोलिसांचा फौजफाटा तैनात करण्यात आला आहे.आज सकाळी मुंबईचे पोलीस आयुक्त संजय पांडे या सगळ्या बंदोबस्ताची पाहणी करण्यासाठी फिल्डवर उतरले होते.

राज ठाकरेंवर गुन्हा दाखल, मुंबईतून मनसैनिकाला अटक

Source: https://maharashtratimes.com/maharashtra/mumbai-news/hanuman-chalisa-fever-in-mumbai-local-train-after-mns-chief-raj-thackeray-stand-against-loudspeaker-on-mosque/articleshow/91305275.cms