मुंबई : विधान परिषदेचे विरोधी पक्षनेते प्रवीण दरेकर यांना मुंबई पोलिसांनी दुसऱ्यांदा नोटीस पाठवली आहे. माता रमाबाई आंबेडकर पोलिस स्टेशनमध्ये हजर राहण्याची सूचना दरेकर यांना नोटीसीतून दिली गेली आहे. ११ एप्रिल रोजी पुन्हा एकदा पोलिस स्टेशनमध्ये चौकशीसाठी हजर राहा, असे आदेश नोटीसीमधून देण्यात आले आहेत. मुंबै बँक बनावट मजूर प्रकरणात ही नोटीस दिली गेली आहे.
आठवड्याभरापूर्वी प्रवीण दरेकर यांची माता रमाबाई आंबेडकर नगर पोलिस स्टेशनमध्ये मुंबै बँक बनावट मजूर प्रकरणात चौकशी झाली होती. जवळपास चार ते पाच तास पोलिसांनी प्रवीण दरेकर यांची चौकशी केली होती. त्यावेळी गरज लागल्यास पुन्हा बोलविण्यात येईल, असं पोलिसांनी दरेकरांना सांगितलं होतं. दरेकरांनीही पोलिसांचं म्हणणं मान्य केलं होतं. आता ११ तारखेला पोलिसांच्या नोटीसीनुसार दरेकरांना पुन्हा चौकशीसाठी जावं लागणार आहे.
आठवडाभरापूर्वीच दरेकरांची चौकशी
मुंबै बँक बोगस मजूर प्रकरणात प्रवीण दरेकर यांची ४ एप्रि रोजी मुंबईतील रमाबाई आंबेडकर पोलीस स्टेशनमध्ये सुमारे चार तास चौकशी करण्यात आली होती. यादरम्यान त्यांना विविध प्रश्न विचारले गेले. चौकशी संपल्यानंतर माध्यमांशी बोलताना त्यांनी चौकशीदरम्यान पोलिसांनी नियबाह्य प्रश्न विचारल्याचा आरोप केला तसंच सरकारचा पोलिस अधिकाऱ्यांवर दबाव असल्याचंही ते म्हणाले होते.
मुंबै बँक बनावट मजूर प्रकरण नेमकं काय?
प्रत्यक्षात मजूर नसतानाही बनावट कागदपत्रांच्या आधारे तसे दाखवून आणि १९९९ पासून २०२१ पर्यंत मुंबै बँकेच्या संचालक मंडळावर मजूर प्रवर्गातून निवडून येऊन नागरिकांबरोबरच सरकारचीही फसवणूक केली, अशा आरोपाखाली एफआयआर दाखल झाल्याने प्रवीण दरेकर अडचणीत आले आहेत.
आम आदमी पक्षाचे महाराष्ट्र सचिव धनंजय शिंदे यांच्या तक्रारीवरून माता रमाबाई आंबेडकर मार्ग पोलिसांनी एफआयआर नोंदवला आहे. ‘या प्रकरणाचा तपास प्राथमिक टप्प्यात असतानाच दरेकर यांनी न्यायालयात धाव घेतली आहे.
Source: https://maharashtratimes.com/maharashtra/mumbai-news/mumbai-police-sent-second-notice-to-pravin-darekar-over-mumbai-bank-fake-labor-case/articleshow/90745224.cms
