मुंबई : मुंबई इंडियन्सला केकेआरविरुद्ध लाजीरवाणा पराभव पत्करावा लागला. त्यानंतर आता मुंबई इंडियन्सची अजून एक गोष्ट समोर येत आहे. मुंबई इंडियन्सने १६ कोटी रुपये वडा पाववर खर्च केले, असे आता समोर आले आहे.
ही गोष्ट नेमकी आहे तरी काय, पाहा…
मुंबई आणि वडा पाव यांचे एक अतुट नाते आहे. मुंबई इंडियन्सचा मार्गदर्शक आणि महान क्रिकेटपटू सचिन तेंडुलकर याच्यासाठी तर वडा पाव म्हणजे जीव की प्राण. शिवाजी पार्क मैदानात खेळून झाल्यावर सचिन वडा पाववर ताव मारायचा. तिथून ते आता थेट मुंबई इंडियन्सचा मार्गदर्शक झाल्यावरही त्याने ही आपली आवड जपली आहे. रोहित शर्मादेखील वडा पावचा मोठा चाहता आहे. आता तर मुंबई इंडियन्सने तब्बल १६ कोटी रुपये वडा पाववर खर्च केल्याचे म्हटले गेले आहे. मुंबईचा केकेआरविरुद्धच्या सामन्यात पराभव झाला आणि त्यानंतर वीरेंद्र सेहवागने एक ट्विट केले होते. त्यामघ्ये वडा पावचा उल्लेख त्याने केला होता. पण आता तर एका फॅनने वडा पावचा उल्लेख करत मुंबई इंडियन्स आणि रोहित शर्माला डिवचले आहे. एका फॅनने ट्विटरवर एक पोस्ट लिहिली आहे. यामध्ये त्यांनी रोहित शर्माला केकेआरविरुद्धच्या सामन्यातील फोटो पोस्ट केला आहे. या सामन्यात रोहित शर्मा हा फक्त तीन धावांवर आऊट झाला होता. केकेआरचा वेगवान गोलंदाज उमेश यादवने त्याला बाद केले होते. त्यावेळी मुंबईची १ बाद ६ अशी अवस्था झाली होती. रोहित हा आयपीएलमध्ये आता सातत्याने अपयशी ठरत असल्याचे पाहायला मिळत आहे, त्याचबरोबर रोहितच्या नेतृत्वाखाली मुंबईला सलग तीन सामने गमवावे लागले आहेत. त्यानंतर या फॅनने ‘ १६ कोटी रुपये वाया घालवले’ असे म्हटले आहे. मुंबई इंडियन्सने यावेळी रोहितला संघात कायम ठेवताना १६ कोटी रुपये मोजले होते. पण सध्याची परिस्थिती पाहता मुंबई इंडियन्ससने हे १६ कोटी वाया घालवले आहेत, असे या फॅनचे म्हणणे असल्याचे दिसत आहे. चाहते मुंबई इंडियन्सबाबत पोस्ट लिहिताना वडा पावचा उल्लेख मात्र आवर्जुन करत असल्याचे यावेळी पाहायला मिळत आहे.
Source: https://maharashtratimes.com/sports/cricket/iplt22/news/mumbai-indians-spent-rs-16-crore-on-vada-pav-know-the-truth-about-social-viral/articleshow/90710745.cms
