म. टा. विशेष प्रतिनिधी, मुंबई
मुंबईत १६ जानेवारीपासून सुरू झालेली लसीकरण मोहीम पुढील वर्षी जानेवारीपर्यंत पूर्ण होण्याची शक्यता आहे. सध्या मुंबईतील १८ वर्षांवरील पात्र असलेल्या ९४ लाखांपैकी ८० लाख नागरिकांना पहिली मात्रा मिळाली आहे.
मुंबईत लसीकरण मोहिमेत दैनंदिन स्तरावर उपलब्ध होणाऱ्या लशींच्या प्रमाणात मोहीम राबवली जात आहे. आत्तापर्यंत अनेकदा लशींच्या कमी उपलब्धततेमुळे मोहीम तात्पुरती स्थगित ठेवण्यात येते. सध्या केंद्राकडून पुरेशा प्रमाणात लशींचा साठा मिळत असल्याने लसीकरण मोहीम सुरळीत सुरू आहे. मुंबईत ९४ लाखांपैकी ८० लाख व्यक्तींना पहिली मात्रा आणि सुमारे ३९ लाख जणांना दुसरी मात्रा देण्यात आली आहे. आताच्या स्थितीत दररोज ५० हजार ते एक लाखापर्यंत मात्रा दिली जात आहे. त्यामुळे लशींची उपलब्धतता पाहता ऑक्टोबरअखेरपर्यंत पहिली मात्रा देण्याची मोहीम पूर्ण होईल, असा विश्वास अतिरिक्त पालिका आयुक्त सुरेश काकाणी यांनी व्यक्त केला.
जानेवारी, २०२२अखेरपर्यंत दुसरी मात्रा
दुसऱ्या मात्रेसाठी जानेवारी, २०२२चे लक्ष्य ठेवण्यात आले आहे. मुंबईत १६ जानेवारीपासून लसीकरण मोहीम सुरू आहे. पालिकेच्या प्रमुख रुग्णालयांसह प्रत्येक प्रभागाप्रमाणे २२७ ठिकाणी लसीकरण मोहीम राबविली जात आहे. त्यात खासगी रुग्णालये, सामाजिक-स्वयंसेवी संस्थांच्या साहाय्याने मोहीम राबविली जात आहे.
पहिली मात्रा : ७९ लाख ८७ हजार ५१०
दुसरी मात्रा : ३८ लाख ९८ हजार ७११
एकूण मात्रा : १ कोटी १८ लाख ८६ हजार २२१
१५ दिवस महत्त्वाचे
मुंबईत पालिकेकडून दररोज करोनाच्या सुमारे ३५ हजार चाचण्या घेतल्या जात आहेत. त्यात सुमारे ४५० रुग्ण करोनाबाधित आढळत आहेत. या स्थितीत मुंबईत बाहेरगावाहून येणाऱ्यांची संख्या लक्षात घेण्यात येत आहे. त्यामुळे सावधगिरी म्हणून चाचण्या घेण्याचे धोरण सुरूच राहणार असल्याचे पालिकेकडून स्पष्ट करण्यात आले आहे.
Source: https://maharashtratimes.com/maharashtra/mumbai-news/the-vaccination-drive-in-mumbai-is-expected-to-be-completed-by-january-next-year/articleshow/86599342.cms