म. टा. खास प्रतिनिधी, मुंबई
मार्च २०२० मध्ये सुरू झालेला करोनाचा संसर्ग २०२१ सुरूच आहे. करोनाची दुसरी लाट ओसरत असली तरी २०२०च्या तुलनेत चालू वर्षात जानेवारी ते एप्रिल या चार महिन्यांच्या कालावधीत मुंबईतील गुन्हेगारीचा आलेख चढाच असल्याचे दिसून येत आहे. सचिन वाझे प्रकरणानंतर पोलिसांनी घेतलेला धसका आणि करोनामुळे जामिनावर तुरुंगाबाहेर असलेले आरोपी, यामुळे गुन्हे वाढत असल्याचे दिसून येत आहे.
मुंबईमध्ये करोनाची पहिली लाट येताच मार्च २०२० मध्ये लॉकडाउन घोषित करण्यात आला. यादरम्यान विनाकारण घराबाहेर पडण्यास मनाई करण्यात आली होती. त्याचप्रमाणे अत्यावश्यक सेवा वगळता इतर दुकाने, बाजारपेठा बंद होत्या. सर्वच व्यवहार ठप्प असल्याने गुन्हेगारीदेखील नियंत्रणात आली होती. करोनाचा प्रादुर्भाव तुरुंगातील कैद्यांनादेखील मोठ्या प्रमाणात होऊ लागल्याने राज्यात सुमारे १२ हजारपेक्षा अधिक कैद्यांना जामिनावर बाहेर सोडण्यात आले. पोलिस दलातही वाढता संसर्ग आणि नियमभंग करणाऱ्यांवर कारवाईसाठी असलेला ताण, यामुळे लॉकडाउन शिथिल होताच मुंबईतील गुन्हेगारी पुन्हा वाढू लागली. त्यातच अँटिलिया स्फोटक प्रकरण आणि मनसुख हिरन हत्या प्रकरणात सचिन वाझेसह आणखी तीन पोलिसांना अटक झाल्याने मुंबई पोलिस दलाला धक्का बसला. या सर्व प्रकरणामुळे पोलिसांच्या कारवाया थंडावल्या आणि दुसरीकडे मुंबईतील गुन्हे वाढत गेले.
२०२०ची जानेवारी ते एप्रिल या चार महिन्यांची आकडेवारी पाहिल्यास त्यातुलनेत चालू वर्षाच्या चार महिन्यांत हत्या, हत्येचा प्रयत्न, जबरी चोरी, बलात्कार, घरफोडी, वाहनचोरी असे सर्वच गुन्हे वाढले आहे. २०२० प्रमाणेच २०२१ च्या सुरुवातीला मुंबईत निर्बंध होते. मात्र वाझे प्रकरणानंतर मोठ्या प्रमाणात बदल्या केल्यामुळे पोलिसांचे मनोबल खचले आणि तुरुंगाबाहेर असलेल्या कैद्यांनाही मोकळे रान मिळाल्याने गुन्हे वाढल्याचे काही अधिकारी सांगत आहेत.
जानेवारी ते एप्रिलदरम्यान गुन्हेगारी
प्रकार २०२१ २०२०
हत्या ५० ४७
हत्येचा प्रयत्न १२८ १०४
दरोडा ७ ४
जबरी चोरी २४६ २३७
खंडणी ९९ ८०
घरफोडी ५३७ ५१०
वाहनचोरी १०९८ ७२५
बलात्कार ३१२ २५६
मारहाण १४५५ १२१४
२०२१ मधील महिनानिहाय गुन्हे
प्रकार जाने. फेब्रु. मार्च एप्रिल
हत्या १२ १५ १५ ०७
हत्येचा प्रयत्न ३६ ३१ १४ २७
दरोडा ०१ ०२ ०२ ०१
जबरी चोरी ८९ ७५ ८० ४७
खंडणी ३१ २५ २५ १२
घरफोडी १७६ १५३ ११५ ९५
वाहनचोरी ३२५ २४८ ३२९ १९८
बलात्कार ७५ ७३ ७० ६६
मारहाण ३४१ २८७ ४३५ ३२१
Source: https://maharashtratimes.com/maharashtra/mumbai-news/crime-in-mumbai-on-the-rise-during-in-january-and-april/articleshow/83327721.cms
