पुन्हा सोन्याचा गणपती – Maharashtra Times

मुंबई : चोरट्यांनी ८ वर्षांपूर्वी मंदिर फोडून गणपतीच्या सोन्याच्या मुखवट्याची व इतर दागिन्यांची चोरी केल्याने खळबळ उडालेल्या दिवेआगरमधील प्रकरणाच्या बाबतीत मुंबई उच्च न्यायालयाकडून सरकारला बुधवारी मोठा दिलासा मिळाला. त्याच सोन्याच्या मुखवट्यातील सोन्याचा वापर करून गणपतीचा अर्धांग मुखवटा तयार करण्याची परवानगी न्या. रेवती माहिते डेरे यांनी राज्य सरकारला दिली. तसेच मुखवटा बनवताना सोन्याचा दर्जा, वजन वगैरे बाबींची जबाबदारी श्रीवर्धनच्या उपविभागीय अधिकाऱ्यांनी व्यक्तिश: घ्यावी, असेही न्यायमूर्तींनी आपल्या आदेशात स्पष्ट केले.

विशेष म्हणजे ज्या दिवशी गणपतीचा अर्धांग मुखवटा प्रथम सापडला तो दिवस आणि उच्च न्यायालयाकडून दिलासादायक आदेश झालेला दिवस, या दोन्ही दिवशी संकष्टी चतुर्थीच होती. आता लवकरच गणपतीच्या अर्धांग मुखवट्याची दिवेआगर येथील गणेश मंदिरात पुन्हा प्रतिष्ठापना होणार असल्याने भाविकांमध्ये उत्साहाचे वातावरण आहे. दिवेआगर गणपती देवस्थान ट्रस्टच्या पदाधिकाऱ्यांनी सुरक्षेची व्यवस्था केलेली असतानाही २३ मार्च २०१२ रोजी चोरट्यांनी दोन सुरक्षारक्षकांची हत्या करून आणि मंदिर फोडून मुखवट्याची व इतर दागिन्यांची चोरी केली होती. या प्रकरणी पोलिसांनी सर्व आरोपींना अटक केल्यानंतर अलिबाग सत्र न्यायालयाने त्यांना दोषी ठरवत शिक्षा ठोठावली. मात्र, आरोपींनी गणेश प्रतिमेचे तुकडे करून त्याच्या लगडी तयार केल्या होत्या. या गुन्ह्यात एक हजार ३०५ ग्रॅमचा गणपतीचा अर्धांग मुखवटा आणि १६१ ग्रॅमचे इतर दागिने असा एकूण एक हजार ४६६ ग्रॅमचे सोने चोरीला गेले होते.

तपासाअंती पोलिसांना लगडीच्या स्वरूपात जवळपास एक हजार ३६१ ग्रॅम सोने हस्तगत करण्यात यश मिळाले. खटला सुरू असताना हे सोने परत मिळण्यासाठी दिवेआगर गणपती देवस्थान ट्रस्टने अर्ज केला होता. मात्र, सरकारने देवस्थानला दिलेला मुखवटाच अस्तित्वात राहिला नाही, या कारणाखाली सत्र न्यायालयाने ट्रस्टची विनंती नाकारून ते सर्व सोने सरकारजमा करण्याचा आदेश दिला होता.

अखेर अर्ज मंजूर

आरोपींनी शिक्षेविरोधात अपील केल्याने हे प्रकरण उच्च न्यायालयात प्रलंबित होते. त्यामुळे रायगडच्या पालकमंत्री अदिती तटकरे यांनी पाठपुरावा केल्यानंतर राज्य सरकारतर्फे उपविभागीय अधिकारी अमित शेडगे यांनी सरकारी वकील श्रीकांत गावंड यांच्यामार्फत मुखवट्यासंदर्भात अर्ज केला होता. त्याच सोन्यापासून मूळ गणपतीच्या अर्धांग मुखवट्यासारखा मुखवटा बनवून तो पुन्हा मंदिरात ठेवण्याची परवानगी मिळावी, असा अर्ज करण्यात आला होता. तो न्या. डेरे यांनी बुधवारी मान्य केला.