म. टा. विशेष प्रतिनिधी, मुंबई
मुंबई पालिकेच्या अर्थसंकल्पात करोनाने आर्थिक कोंडी झाल्यानंतरही २३ महत्त्वाच्या प्रकल्पांसाठी मुबलक तरतूद करण्यात आली आहे. यंदाच्या अर्थसंकल्पात अशा २३ प्रकल्पांसाठी तब्बल सात हजार कोटी रुपयांची वाढ केली आहे. मात्र, ही वाढ होतानाच प्रकल्पांना होणाऱ्या विलंबांमुळेच खर्चातील वाढ कारणीभूत ठरत असल्याचा मुद्दा उपस्थित केला जात आहे.
मुंबईतील नागरी सुविधांसह भविष्यकालीन योजनांसाठी पालिकेकडून वेगवेगळे प्रकल्प हाती घेण्यात येतात. मात्र, यंदाच्या अर्थसंकल्पात करोनामुळे आर्थिक नियोजनावर दुष्परिणाम घडविला आहे. करोनाने जगभरात आर्थिक विश्वास धक्का दिला असून त्यात मुंबईचाही समावेश आहे. परिणामी, देशातील सर्वांत श्रीमंत पालिका म्हणून ओळखल्या जाणाऱ्या पालिकेसमोरही आर्थिक आव्हाने ओढवली आहेत. उत्पन्नाचे स्रोत असलेल्या महसुलापासून विविध घटकांचा महसूल घडल्याने विकास कामेही खोळंबणे स्वाभाविक ठरले.
मुंबई पालिकेकडून यंदाचा अर्थसंकल्प सादर करताना त्यात नागरी सुविधांमधील पाणी, आरोग्य, रस्ते आदी विभागांप्रमाणेच अन्य प्रकल्पांसाठी किती निधी उपलब्ध होतो, याकडे सर्वांचे लक्ष लागले होते. त्यात उत्पन्न घटल्यानंतरही खर्चात वाढ झाल्याने आर्थिक ताळेबंदातील तरतुदीं महत्त्वाच्या ठरल्या. या पार्श्वभूमीवर, करोनामुळे रखडलेल्या प्रकल्प कामाना यंदा महापालिकेकडून गती दिली जाणार आहे. अर्थसंकल्पात रस्ते, पाणी, आरोग्यासह २३ प्रकल्पांच्या पूर्ततेसाठी सुमारे सात हजार कोटी रुपयांची अर्थसंकल्पात वाढ केली आहे.
मुंबई पालिकेचा २०२१-२२ यंदाचा अर्थसंकल्प ३९,०३८.८३ कोटींचा असून त्यात गतवर्षीच्या तुलनेत ५,७९७.८१ कोटींची वाढ केली आहे. त्यात सागरीकिनारा रस्ता प्रकल्प, गोरेगाव-मुलुंड लिंक रोड, सांडपाणी प्रक्रिया केंद्र, घनकचरा व्यवस्थापन, गारगाई-पिंजाळ प्रकल्प, जलवाहिनी प्रकल्प, मिठी नदी प्रकल्पांची कामे, पालिकेच्या विविध रुग्णालयांसाठी निधीचा तरतूद केली आहे
खर्चात वाढ, महसुलात घट
पालिकेचा गेल्या वर्षीच्या ७८हजार ८२९ कोटींचा अर्थसंकल्प यंदा ८७ हजार ५८३ कोटी रुपयांवर गेला आहे. त्यातील २३ प्रकल्पांवरील तरतूद सुमारे सात हजार कोटी रुपयांनी अधिक ठरली आहे. मात्र, प्रकल्पांचा खर्च वाढत असताना दुसरीकडे पालिकेचा महसूल घटत चालला आहे. तसेच करोनासह इतर कारणांनी होणाऱ्या विलंबामुळे खर्चात वाढ होत असल्याचाही मुद्दा वारंवार उपस्थित केला जात आहे.
Source: https://maharashtratimes.com/maharashtra/mumbai-news/7-thousand-crore-rupees-increases-in-project-in-bmc-project-2021/articleshow/80746512.cms
