Corona: मुंबई महापालिका दक्ष! ३१ ऑक्टोबरपर्यंत ठेवणार काटेकोर लक्ष – Maharashtra Times

म. टा. विशेष प्रतिनिधी, मुंबई

मुंबईमध्ये करोनारुग्णांची संख्या वाढली नसली तरी अहमदनगर, सांगली, सातारा येथे रुग्णसंख्येमध्ये वाढ होत आहे. ग्रामीण भागामधील वाढती रुग्णसंख्या लक्षात घेता पालिका प्रशासनाने ३१ ऑक्टोबरपर्यंत शहरातील प्रत्येक प्रभागामध्ये रुग्णसंख्या कशाप्रकारे व किती वेगाने वाढते याकडे अधिक काळजीपूर्वक लक्ष ठेवण्याचा निर्णय घेतला आहे.

पालिकेच्या वरिष्ठ अधिकाऱ्यांनी दिलेल्या माहितीनुसार, डी प्रभागामध्ये रुग्णसंख्येमध्ये झालेली वाढ ही उंच इमारती तसेच रहिवासी संकुलांमध्ये असल्याचे दिसते. यातील अनेक मुंबईकर हे प्रवास करून आलेले, सतत वेगवेगळ्या ठिकाणी ये-जा करणारेही आहेत. प्रत्येक प्रभागामध्ये रुग्णसंख्येमध्ये होणारी वाढ ही कोणत्या कारणांनी होते याचा अभ्यास करणे गरजेचे आहे. पाचशेच्यावर रुग्णसंख्येची नोंद होऊ नये यासाठी प्रयत्न केले जात असल्याचे पालिकेचे अतिरिक्त आयुक्त सुरेश काकाणी यांनी सांगितले. नवरात्रोत्सव, दसरा आणि दिवाळीची खरेदी या कारणांसाठी गर्दी झाल्यामुळे रुग्णसंख्येमध्ये वाढ होण्याची शक्यता नाकारता येत नाही, असेही ते म्हणाले.

शाळा सुरू झाल्यानंतर रुग्णसंख्येमध्ये काही भर पडली का हे पाहण्यासाठी तूर्तास पालिकेकडून कोणताही अभ्यास करण्यात येणार नाही. मुलांमध्ये संसर्ग होण्याची शक्यता कमी आहे तसेच काही दिवसांतच दिवाळीची सुटी सुरू होणार असल्याने तो दिलासाही मिळणार आहे.

निर्बंध कडक करणार का?

पालिका प्रशासनाने सध्या तरी निर्बंध अधिक कडक करण्याचे धोरण स्वीकारलेले नाही. मास्क न घालणे, रस्त्यावर थुंकणे या कारणांसाठी दंडात्मक कारवाई केली जात आहे. पावसाळी वातावरणामुळे रुग्णसंख्या तसेच करोनारुग्णांच्या संख्येमध्ये काही घट होते का, यादृष्टीने लक्ष ठेवण्यात येत आहे.

अशी आहे मुंबईची स्थिती

मुंबईमध्ये २ ते ८ ऑक्टोबर या कालावधीमध्ये रुग्णवाढीचा दर ०.०६ टक्के इतका होता. रुग्णदुपटीचा कालावधी १,०९१ दिवस इतका नोंदवण्यात आला आहे. बाधितांची संख्या लक्षात घेता यापुढील दिवसांत रुग्णवाढ झपाट्याने होण्याची शक्यता कमी आहे. तरीही पालिकेने ८,०८८ ऑक्सिजनच्या खाटांची उपलब्धता ठेवली आहे. शनिवारी अतिजोखमीच्या ३,२५२ रुग्णांना शोधून काढण्यात आले आहे, अशी माहिती संसर्गजन्य आजाराचे तज्ज्ञ डॉ. हरिश पाटील यांनी दिली.