म. टा. प्रतिनिधी, मुंबई
जवळजवळ एका शतकाच्या प्रदीर्घ कालावधीनंतर दक्षिण मुंबईत फेरेरे पुलाच्या जागी नवा पूल आकार घेत आहे. या नवीन पुलाच्या डेकचे काम नूकतेच पूर्ण झाले असून जोडरस्त्याचे काम बाकी आहे. ३० एप्रिलपर्यंत हे काम पूर्ण होण्याचा अंदाज असून त्यानंतर दक्षिण मुंबईतील वाहतूक कोंडी फुटण्यास मदत होईल. या पुलावर पादचाऱ्यांना चालण्यासाठी प्रशस्त जागा असल्याने पायी चालणाऱ्यांनाही दिलासा मिळेल.
फेरेरे पूलाच्या सध्या अस्तित्वात असलेल्या जोडरस्त्यांवर वीज आणि इंटरनेटच्या केबलचे जाळे पसरले आहे. जोडरस्त्यांचे काम करण्यासाठी केबल हटवणे आवश्यक आहे. यासाठी पश्चिम रेल्वेने संबंधित व्यवस्थापनाला नोटिसा पाठवत १० जानेवारीपर्यंतची मुदत दिली आहे. या मुदतीनंतर काम करताना केबलचे नुकसान झाल्यास रेल्वे प्रशासन त्याला जबाबदार राहणार नाही, असे पश्चिम रेल्वेकडून सांगण्यात आले.
फेरेरे पुलाच्या पुनर्बांधणीत रेल्वे रुळांच्या वरील भाग, म्हणजेच पुलाच्या डेकचे काम पूर्ण झाले आहे. नव्या डेकची उंची १.४ मीटर आहे. जुन्या डेकची उंची १.३ मीटर होती. सध्या केवळ पुलाला जोडणाऱ्या जोडरस्त्यांची उंची वाढवण्याचे काम बाकी आहे. हा भाग रेल्वे रुळांवर असल्याने या जोडरस्त्याचे काम रेल्वेकडूनच करण्यात येईल, असे रेल्वेच्या अधिकाऱ्यांनी सांगितले. जोडरस्त्यांची उंची वाढवण्याचे काम पूर्ण करण्यासाठी निविदा प्रक्रिया पूर्ण झाली आहे. हे काम पूर्ण करण्यासाठी ३० एप्रिलपर्यंत कालमर्यादा निश्चित करण्यात आली आहे.
या कामात सरकारी आणि खासगी कंपन्यांच्या केबलचा अडथळा मोठ्या प्रमाणात आहे. त्याचबरोबर काही बांधकामेदेखील हटवावी लागणार आहेत. यासाठी महापालिकेच्या अधिकाऱ्यांशी समन्वय साधून काम करत आहोत. हे अडथळे वेळेत हटवले गेल्यास पुलाचे काम निर्धारित वेळेत पूर्ण होऊन प्रवाशांना वापरण्यासाठी पूल खुला केला जाईल, अशी माहिती रेल्वे अधिकाऱ्यांनी दिली.
दक्षिण मुंबईचा श्वास मोकळा
– फेरेरे पूल खुला झाल्यानंतर नाना चौकातील केनेडी पूल आणि मुंबई सेंट्रल येथील सुखसागर जंक्शनजवळील वारेकर पूल या दोन पुलांवरील वाहतुकीचा भार कमी होईल. यामुळे दक्षिण मुंबईकरांना प्रवासात मोकळा श्वास घेता येईल.
फेरेरे पुलाचा इतिहास
– १९२१मध्ये उभारणी
– आयआयटी-रेल्वेच्या पाहणीत धोकादायक
– सप्टेंबर, २०१९ – अवजड वाहनांसाठी बंद
– जानेवारी, २०२० – पूल दुरुस्तीसाठी संपूर्ण बंद
– जानेवारी २०२१ – पुलाच्या डेकचे काम पूर्ण, जोडरस्त्याचे काम सुरू
– लॅमिंग्टन रोड ते नाना चौक येथे जाण्यासाठी पुलाचा वापर
Source: https://maharashtratimes.com/maharashtra/mumbai-news/frere-bridge-in-south-mumbai-to-be-replaced-by-new-one/articleshow/80126544.cms
