घोषणा कुठवर आल्या? महापालिकेचा शनिवारी अंर्थसंकल्प, मुंबईकरांच्या हाती काय लागणार – महाराष्ट्र टाइम्स (Maharashtra Times)

मुंबई : मुंबई महापालिकेचा सन २०२३-२४चा अर्थसंकल्प येत्या शनिवारी, ४ फेब्रुवारी रोजी मांडण्यात येणार आहे. २०२२-२३च्या अर्थसंकल्पात पालिकेने विविध नवीन विकासकामांच्या घोषणा केल्या होत्या. त्यापैकी रस्ते, सफाई कामगार आश्रय योजना, मुंबईचे सौंदर्यीकरण, आरोग्य विषयक उपक्रम सुरू केले असून देवनार कत्तलखाना, टनेल लाँड्री प्रकल्पाच्या निविदा रद्द करण्यात आल्या आहेत तर कर्करोगावरील आधुनिक उपचाराची प्रोटॉन थेरपी गुंडाळण्यात आली असून समुद्रातील खारे पाणी गोडे करणे, मुंबई हवामान कृती आराखडा कक्ष अद्याप कागदावरच आहेत.

सन २०२२-२३मध्ये ४५ हजार ९४९.२१ कोटींचा अर्थसंकल्प सादर करण्यात आला होता. २०२२मध्ये नियोजित वेळेत निवडणूक न झाल्याने पालिकेत ८ मार्चपासून प्रशासकीय राजवट सुरू आहे. या पार्श्वभूमीवर आयुक्त व प्रशासक इकबालसिंह चहल हे अर्थसंकल्प मांडून तेच मंजुरी देणार आहेत. मुंबईत २०२०पासून सुरू झालेले करोनाचे संकट गेल्या वर्षीपासून नियंत्रणात आले आहे. त्यामुळे विकासकामे वाढवण्यावर भर देण्यात आला आहे. विशेषतः करोनानानंतर आरोग्य यंत्रणा अद्यावत करण्यात आली असून शारीरिक तंदुरुस्तीवर भर देण्यात आला आहे.

… हे प्रकल्प गुंडाळले

प्रोटॉन थेरपी
मुंबईत कर्करोगावर उपचार घेण्यासाठी देशभरातून रुग्ण येत असतात. कर्करोगाच्या रुग्णांना टाटा कर्करोग रुग्णालयाच्या मदतीने अद्ययावत उपचार पद्धतीची प्रोटॉन थेरपीची सुविधा उभारण्याची घोषणा करण्यात आली होती. हा उपक्रम गुंडाळण्यात आला असल्याचे सांगितले जाते आहे.

टनेल लाँड्री

पालिकेच्या विविध रुग्णालयांतील रुग्णांचे कपडे धुलाईसाठी शिवडीत १६० कोटी रुपये खर्च करून टनेल लाँड्रीची घोषणा करण्यात आली होती. खर्चात वाढ, निविदा प्रक्रियेत झालेले भ्रष्टाचाराचे आरोप यामुळे या कामाच्या निविदा रद्द करण्यात आल्या. जागेच्या कमतरतेचे कारण पालिकेने दिले असून नवीन जागेचा शोध सुरू असून ती मिळाल्यानंतर फेरनिविदा मागवण्यात येणार असल्याचे स्पष्ट केले आहे.

…हे प्रकल्प कागदावरच

मुंबई हवामान कृती आराखडा कक्ष

मुंबईत सातत्याने हवेच्या ढासळत्या गुणवत्तेच्या पार्श्वभूमीवर पालिकेने मुंबई हवामान कृती आराखडा बनवला आहे. हा आराखडा राबविण्यासाठी अभियांत्रिकी आणि वास्तूशास्त्रज्ञांचा समावेश असलेला मुंबई हवामान कृती आराखडा कक्ष स्थापन करण्याची घोषणा गेल्या वर्षी करण्यात आली होती.

जकात नाके ओस पडले

जीएसटी लागू झाल्यानंतर पालिकेचे वाशी, मुलुंड, दहिसरसह पाच जकात नाके ओस पडले आहेत. या जागांवर परिवहन आणि व्यावसायिक केंद्राची उभारणी करण्याची घोषणा करण्यात आली होती. या कामासाठी सल्लागार नेमण्यात आला आहे. त्या पलीकडे अद्याप पावले उचलण्यात आलेली नाही. वरळीच्या धर्तीवर विक्रोळीत इंजिनीअर हब उभारणीच्या कामाची गती कागदावरच आहे.

समुद्राचे खारे पाणी गोडे करणे

मुंबईच्या वाढत्या लोकसंख्येची तहान भागवण्यासाठी पालिकेचे विविध पातळ्यांवर प्रयत्न सुरू आहेत. या प्रयत्नांपैकी एक समुद्राचे खारे पाणी गोडे करण्याचा प्रकल्प आखण्यात आला आहे. प्रकल्पाचा सुसाध्यता अहवाल आणि एकूण प्रकल्प अहवाल (डीपीआर) बनवण्याचे काम सुरू आहे. डीपीआर तपासण्यासाठी स्मिथ अँड कंपनी या एजन्सीची नियुक्ती केली आहे.

… या प्रकल्पांना गती

सफाई कामगार आश्रय योजना

कोस्टल रोड

गोरेगाव-मुलुंड लिंक रोड

दहिसर, पोयसर, ओशिवरा, मिठी नदीचे पुनरुज्जीवन

१७० ठिकाणी शिवयोग केंद्र

मराठी नाट्य विश्व संग्रहालय

सौंदर्यीकरण प्रकल्प झपाट्याने

मुंबई सौंदर्यीकरण प्रकल्पातील कामे झपाट्याने सुरू झाली आहेत. रस्ते, पदपथ, उड्डाणपुलाखालील मोकळ्या जागांचे सुशोभीकरण केले जात आहे. १७०० कोटींहून अधिक खर्च या प्रकल्पासाठी केला जातो आहे.

रस्तेकामे, ‘आपला दवाखाना’ उपक्रम

मुंबईत दरवर्षी सुमारे दीड ते दोन हजार कोटी रुपयांची रस्तेकामासाठी तरतूद केली जाते. गेल्या वर्षी मुंबईतील अतिरिक्त ४०० रस्तेबांधणीची कामे करण्याचा निर्णय घेण्यात आला असून त्यासाठी तब्बल ६ हजार कोटी रुपयांची तरतूद करण्यात आली आहे. तसेच ‘आपला दवाखाना’ प्रकल्प वेगाने सुरू असून लाखो रहिवाशांना आपल्या घराजवळ असलेली ही सुविधा उपयुक्त ठरली आहे.

… या प्रकल्पांचे भूमिपूजन

– वांद्रे, वरळी, धारावी, घाटकोपर, भांडुप, वर्सोवा, मालाड येथील सांडपाणी पुनर्प्रक्रिया प्रकल्प : २६ हजार कोटी

– ४०० किमी रस्त्यांचे काँक्रीटीकरण : ६००० कोटी

– भांडुप सुपर स्पेशालिटी रुग्णालय : ६७० कोटी

– सिद्धार्थ रुग्णालय, गोरेगाव : ४०५ कोटी

– ओशिवरा प्रसुतिगृह, जोगेश्वरी : ११८ कोटी

– मुंबई सौंदर्यीकरण प्रकल्प १७५० कोटी