मोठी बातमी: सीएनजी गॅसच्या दरात घसरण, मुंबईत मध्यरात्रीपासून नवे दर लागू – महाराष्ट्र टाइम्स (Maharashtra Times)

मुंबई: इंधनाचे दर आणि महागाई गगनाला भिडल्यामुळे सामान्यांची चिंता वाढली असतानाच एक दिलासा देणारी बातमी समोर आली आहे. मुंबईत सीएनजीच्या दरात घट झाली आहे. महानगर गॅस लिमिटेकडून पत्रक जारी करुन यासंदर्भात माहिती देण्यात आली आहे. त्यानुसार मुंबईत सीएनजी २.५० रुपयांनी स्वस्त होणार आहे. त्यामुळे प्रति किलो सीएनजीचा दर ८७ रुपये इतका होईल. यापूर्वी सीएनजीचा प्रतिकिलो दर ८९.५० रुपये इतका होता. मात्र, आता हा दर २.५० रुपयांनी कमी झाल्याने सीएनजी वाहनधारकांना मोठा दिलासा मिळणार आहे. मुंबईत मंगळवारी मध्यरात्रीपासून सीएनजीचे नवे दर लागू होणार आहेत.

महानगर गॅसकडून मुंबई आणि आसपासच्या भागांमध्ये सीएनजी आणि पीएनजीचा पुरवठा केला जातो. त्यामुळे महानगर गॅसच्या नव्या निर्णयाचा फायदा अन्य भागांमध्येही होणार आहे. परिणामी मुंबई आणि आसपासच्या शहरात सीएनजीच्या किंमतीमध्ये कपात झाली आहे. या निर्णयाचा फायदा सीएनजीवर चालणाऱ्या कार आणि विशेषत: रिक्षा आणि टॅक्सीचालकांना होणार आहे. एकीकडे पेट्रोल आणि डिझेलचे दर गगनाला भिडले असताना सीएनजी हा वाहनधारकांसाठी तुलनेत स्वस्त पर्याय होता. परंतु, पेट्रोल-डिझेलच्या बरोबरीने सीएनजीचे दरही वेगाने वाढत होते. त्यामुळे वाहनचालकांमध्ये नाराजीचे वातावरण होते. महानगर गॅसने नोव्हेंबर महिन्यात सीएनजीच्या दरात ३.५० रुपयांनी वाढ केली होती. गेल्या वर्षभरात सीएनजीच्या किंमती ७० टक्क्यांनी वाढल्या आहेत. त्यामुळे २०२२-२३ या वर्षात सीएनजीच्या वापरात घट झाली होती. मात्र, आता महानगर गॅसने सीएनजीच्या दरात २.५० रुपयांनी कपात करुन वाहनधारकांना काहीप्रमाणात दिलासा देण्याचा प्रयत्न केला आहे.