CNG Price News : महागाईमुळे बजेट बिघडलेल्या मुंबईकरांना महानगर गॅसने मोठा दिलासा दिला आहे. आज मध्यरात्रीपासून सीएनजीच्या दरात (CNG Price ) प्रतिकिलो 2.50 रुपयांची कपात होणार आहे. महानगर गॅसने (Mahanagar Gas) याबाबतची माहिती दिली आहे. त्यामुळे आधीच महागाईत होरपळणाऱ्या वाहनचालकांना मोठा दिलासा दिला आहे. आज मध्यरात्रीपासून हे नवीन दर जाहीर होणार आहेत.
मुंबई आणि आसपासच्या शहरात सीएनजीच्या किंमती कमी करण्यात आल्या आहेत. त्यामुळे एक किलो सीएनजीसाठी आता अडीच रुपये कमी मोजावे लागणार. आज मध्यरात्रीपासून नवीन किंमती नुसार 87 रुपये प्रति किलो दराने मिळणार आहे. पेट्रोलच्या तुलनेत सीएनजीचे दर हे 44 टक्क्यांनी स्वस्त असल्याचा दावा महानगर गॅसने केला आहे.
मुंबई आणि जवळील परिसरात महानगर गॅस लिमिटेड ही कंपनी प्रमुख सीएनजी, पीएनजी गॅस वितरक आहे. त्यामुळे सीएनजी गॅसच्या दर कपातीचा मोठा फायदा कार चालकांपासून ते रिक्षा चालकांनादेखील होणार आहे. सीएनजीच्या दरवाढीमुळे अनेकांचे बजेट बिघडले होते. या दरकपातीमुळे काही प्रमाणात दिलासा मिळणार आहे.
सीएनजीच्या किमतीत वाढ झाल्यामुळे, सीएनजी वाहनांच्या वापरामुळे ग्राहकांची पेट्रोल-डिझेलच्या तुलनेन खर्चात जास्त बचत होत नाही. सीएनजी आणि पेट्रोल-डिझेलच्या दरात फारसा फरक राहिला नव्हता. त्यामुळे ग्राहकांमध्ये नाराजी होती. त्याच्या परिणामी चालू आर्थिक वर्षात व्यावसायिक वाहनांमध्ये सीएनजीचा वापर कमी झाला असल्याचे समोर आले होते.
नोव्हेंबर महिन्यात झाली होती दरवाढ
महानगर गॅस लिमिटेडने नोव्हेंबर महिन्यात सीएनजी गॅस दरवाढ केली होती. सीएनजीच्या दरात प्रति किलो 3.50 रुपयांची दरवाढ करण्यात आली होती. तर, घरगुती वापरासाठी पीएनजीच्या (PNG) दरात दीड रूपये प्रति एससीएमची (स्टॅंडर्ड क्युबिक मीटर) वाढ करण्यात आली होती. या दरवाढीनंतर मुंबईत सीएनजीचा दर 89.50 रुपये प्रति किलो इतका झाला. तर, घरगुती पीएनजीचा दर 54 रुपये प्रति एससीएम झाला होता.
सीएनजी वाहनाच्या वापरात घट
रेटिंग एजेंसी इक्रा (ICRA) एजन्सीच्या रिपोर्टनुसार, नैसर्गिक वायूच्या किमती वाढल्याने चालू आर्थिक वर्ष 2022-23 मध्ये सीएनजी वाहनाच्या वापरात घट झाली. , जागतिक स्तरावर नैसर्गिक वायूच्या किमती वाढल्यामुळे गेल्या वर्षभरात सीएनजीच्या किमती 70 टक्क्यांनी वाढल्या आहेत. त्यामुळे डिझेल आणि सीएनजीमधील किंमतीतील तफावत खूपच कमी झाल्याने दोन्हीचे दर सरासरी समान आहेत. त्यामुळे सीएनजी वाहनांचा पर्याय टाळत असल्याचे अहवालात नमूद करण्यात आले होते.
Source: https://news.google.com/__i/rss/rd/articles/CBMicmh0dHBzOi8vbWFyYXRoaS5hYnBsaXZlLmNvbS9idXNpbmVzcy9tdW1iYWktY25nLXByaWNlLW1haGFuYWdhci1nYXMtbGltaXRlZC1yZWR1Y2UtY25nLXByaWNlLXJzLTItNS1wZXIta2ctMTE0NzE0ONIBdmh0dHBzOi8vbWFyYXRoaS5hYnBsaXZlLmNvbS9idXNpbmVzcy9tdW1iYWktY25nLXByaWNlLW1haGFuYWdhci1nYXMtbGltaXRlZC1yZWR1Y2UtY25nLXByaWNlLXJzLTItNS1wZXIta2ctMTE0NzE0OC9hbXA?oc=5
