मुंबई: सोशल मीडियावर विशेष लोकप्रिय असणारी उर्फी जावेद हिच्या अडचणीत आणखी वाढ झाली आहे. शनिवारी भाजप प्रदेश महिला मोर्चाच्या अध्यक्षा चित्रा वाघ यांनी उर्फीविषयी ट्वीट करत तिच्यावर टीका केली होती. उर्फी अनेकदा तिच्या बोल्ड आणि अतरंगी अंदाजात पॅपाराझींच्या कॅमेऱ्यात कैद झाली आहे. तिचा असाच एक व्हिडिओ शेअर करत वाघ यांनी ‘मुंबईच्या रस्त्यांवर हे काय चाललंय?’ असा सवाल केला होता. आता त्यांनी याप्रकरणी थेट मुंबई पोलीस आयुक्त विवेक फणसळकर यांची भेट घेतली.
वाघ यांनी ट्वीट केले आहे की, ‘मुंबईच्या रस्त्यांवर सार्वजनिक ठिकाणी बिभत्स आणि किळसवाणे अंगप्रदर्शन करत फिरणाऱ्या उर्फी जावेदवर तात्काळ कायदेशीर कारवाई करावी यासाठी मुंबईचे पोलीस आयुक्त आणि सहआयुक्त कायदा व सुव्यवस्था यांची भेट घेतं मागणी केली.’ त्यांनी या ट्वीटमध्ये आयुक्तांसोबतचा फोटो शेअर केला आहे. याशिवाय त्यांनी आयुक्तांना दिलेल्या पत्राचाही फोटो शेअर केला आहे.
हे वाचा-कधी झेब्रा क्रॉसिंग रंगवलं तर कधी सिनेमाचं पोस्टर… नानांनी पाहिलाय हलाखीचा काळ
वाघ यांनी आयुक्तांना दिलेल्या पत्राचा विषय असा लिहिला की, ‘उर्फी जावेदरुपी स्त्री देहाचा बाजार रोखा’. त्यांनी पुढे पत्रात असे नमूद केले आहे की, ‘उर्फी जावेद या अभिनेत्रीने भर रस्त्यात आपल्या देहाचे केलेले प्रदर्शन समाजमाध्यमांवर चर्चेचा विषय बनले आहे. घटनेने दिलेला आचार, विचार स्वातंत्र्याचा हक्क इतक्या उघड्या नागड्या मनोवृत्तीत प्रकट होईल याची कोणीच कल्पना केली नसेल. स्त्री देहाचे असे मुंबईतल्या सार्वजनिक ठिकाणी भर रस्त्यातील अत्यंत हीन, किळसवाणे प्रदर्शन भारतीय संस्कृतीच्या, सभ्यतेला कलंक आहे.’
त्यांनी पुढे असे लिहिले की, ‘या अभिनेत्रीने खासगी जीवनात काय करावे याच्याशी समाजाला काहीच देणेघेणे नाही. मात्र केवळ प्रसिद्धी मिळवण्यासाठी या अभिनेत्रीने आपल्या देहाचा मांडलेला बाजार चीड आणणारा आहे. तिला आपल्या देहाचे प्रदर्शन करायचे असेल तर तिने ते चार भिंतीच्या आड जरूर करावे. मात्र अशा पद्धतीच्या भावना चेतवणाऱ्या कृत्याने समाजातील विकृत मनोवृत्तीला आपण खतपाणी घालत आहोत याची या अभिनेत्रीला जाणीव नसेल. या कृत्याबद्दल सदर अभिनेत्रीवर तातडीने संबंधित कायद्यानुसार कठोर कारवाई करावी, अशी भारतीय जनता पार्टी महिला मोर्चाची मागणी आहे.
Source: https://news.google.com/__i/rss/rd/articles/CBMivQFodHRwczovL21haGFyYXNodHJhdGltZXMuY29tL2VudGVydGFpbm1lbnQvZW50ZXJ0YWlubWVudC1uZXdzL2JvbGx5d29vZC1uZXdzL2NoaXRyYS13YWdoLW1ldC1tdW1iYWktcG9saWNlLWNvbW1pc3Npb25lci1yZWdhcmRpbmctYWN0aW9uLXRvLXRha2UtYWdhaW5zdC11b3JmaS1qYXZlZC9hcnRpY2xlc2hvdy85NjY1OTExNC5jbXPSAcEBaHR0cHM6Ly9tYWhhcmFzaHRyYXRpbWVzLmNvbS9lbnRlcnRhaW5tZW50L2VudGVydGFpbm1lbnQtbmV3cy9ib2xseXdvb2QtbmV3cy9jaGl0cmEtd2FnaC1tZXQtbXVtYmFpLXBvbGljZS1jb21taXNzaW9uZXItcmVnYXJkaW5nLWFjdGlvbi10by10YWtlLWFnYWluc3QtdW9yZmktamF2ZWQvYW1wX2FydGljbGVzaG93Lzk2NjU5MTE0LmNtcw?oc=5
