मिळालेल्या माहितीनुसार, महेंद्र माळी या मार्बल दुकान व्यावसायिकाला पोलादपूर येथील मुंबई-गोवा राष्ट्रीय महामार्गाच्या लोखंडी संरक्षक कठड्यापासून काही अंतरावर भूपेंद्र बियर शॉपी ते मनिष मार्बल यादरम्यानच्या रस्त्यावर अंदाजे ४० ते ४५ वर्ष वयाच्या पुरूष जातीचे, डोक्यावरील केस वाढलेले व पांढरे झालेले तर हातावर अस्पष्ट गोंदलेल्या अनोळखी व्यक्तीचा मृतदेह आढळून आला. ही घटना कळताच पोलादपूर पोलीस पथक व परिसरातील ग्रामस्थांनी घटनास्थळी धाव घेतली.
प्राथमिक अंदाजानुसार ही व्यक्ती दारू पिऊन उपाशीपोटी राहिल्याने मयत झाली असावी. पोलादपूर पोलिसांनी याप्रकरणी अकस्मात मृत्यूची नोंद केली आहे. पोलादपूर ग्रामीण रूग्णालयामध्ये शवविच्छेदन करण्यात आले असल्याची माहिती पोलादपूर पोलिसांनी दिली.
दरम्यान, याप्रकरणी पोलीस नाईक प्रशांत नटे यांनी सहाय्यक पोलीस निरीक्षक युवराज म्हसकर यांच्या मार्गदर्शनाखाली तपास सुरू केला आहे. तसंच पोलिसांनी दिलेल्या वर्णनानुसार कोणी व्यक्ती बेपत्ता असल्यास पोलीस ठाण्याशी तातडीने संपर्क साधण्याचं आवाहन करण्यात आलं आहे.
Source: https://news.google.com/__i/rss/rd/articles/CBMipwFodHRwczovL21haGFyYXNodHJhdGltZXMuY29tL21haGFyYXNodHJhL3JhaWdhZC9hLW1hcmJsZS1idXNpbmVzc21hbi1zdWRkZW5seS1zYXctdGhlLWRlYWQtYm9keS1vZi1hLTQwLXllYXItb2xkLW1hbi1vbi10aGUtbXVtYmFpLWdvYS1oaWdod2F5L2FydGljbGVzaG93Lzk2NjI4OTIwLmNtc9IBqwFodHRwczovL21haGFyYXNodHJhdGltZXMuY29tL21haGFyYXNodHJhL3JhaWdhZC9hLW1hcmJsZS1idXNpbmVzc21hbi1zdWRkZW5seS1zYXctdGhlLWRlYWQtYm9keS1vZi1hLTQwLXllYXItb2xkLW1hbi1vbi10aGUtbXVtYmFpLWdvYS1oaWdod2F5L2FtcF9hcnRpY2xlc2hvdy85NjYyODkyMC5jbXM?oc=5