‘जीएसटी’ चुकवेगिरीत मुंबई अग्रस्थानी; यंदा ६८ जणांवर कारवाईचा बडगा – Maharashtra Times

मुंबई : राज्यात गेल्या तीन वर्षांपासून वस्तू व सेवाकराचे (जीएसटी) संकलन वाढत असतानाच जीएसटीच्या चुकवेगिरीचा आकडाही वाढत चालला आहे. राज्यातील जीएसटी चुकवेगिरीच्या विविध प्रकरणांत आतापर्यंत ६८ जणांवर कारवाईचा बडगा उगारला असून, राज्यात सर्वाधिक करचुकवेगिरी मुंबईत झाल्याची माहिती मंत्रालयातील सूत्रांनी दिली आहे. राज्यातील एकूण जीएसटी चुकवेगिरीतील ६६.२ टक्के चुकवेगिरी मुंबईत झाली असून, राज्यातील एकूण ६८ प्रकरणांपैकी ४५ प्रकरणे ही मुंबईतच असल्याची माहिती सूत्रांनी दिली आहे.

राज्य सरकारच्या जीएसटी संकलनामध्ये गेल्या काही दिवसांपासून मोठ्या प्रमाणात वाढ होताना दिसत आहे. महाराष्ट्रात जीएसटी संकलनाने दरमहा २२ हजार कोटी रुपयांचा टप्पा गाठल्याची माहिती जाहीर करण्यात आली. त्यानंतर आता राज्यात जीएसटीच्या चुकवेगिरीचा आकडाही वाढत असल्याचे दिसून आले आहे. राज्यात २०२०-२०२१ या आर्थिक वर्षात चुकवेगिरीची एकूण ११ प्रकरणे आढळली. त्यानंतर २०२१-२०२२ या काळात हा आकडा नऊपर्यंत खाली आला होता. मात्र यंदाच्या आर्थिक वर्षांत चुकवेगिरीची एकूण ४८ प्रकरणे आढळल्याची माहिती ‘महाराष्ट्र टाइम्स’ला मिळाली आहे.

काही दिवसांपूर्वीच राज्याचे उपमुख्यमंत्री देवेंद्र फडणवीस यांनी वस्तू व सेवाकर विभागाची बैठक घेतली होती. या बैठकीत याबाबत सविस्तर चर्चा करण्यात आली. जीएसटी चुकवेगिरी रोखण्यासाठी आवश्यक त्या उपाययोजना आखण्याच्या सूचना संबंधित विभागाच्या अधिकाऱ्यांना उपमुख्यमंत्री देवेंद्र फडणवीस यांनी दिल्या असल्याची माहिती मंत्रालयातील सूत्रांनी दिली.

जीएसटी चुकवेगिरीच्या विभागावर आकडेवारीवर नजर टाकली असता, मुंबईत सर्वाधिक करचुकवेगिरी आढळून आली आहे. राज्यातील एकूण प्रकरणांमधील मुंबईचे प्रमाण ६६.२ टक्के इतके आहे. मुंबईपाठोपाठ पुण्यात एकूण आठ प्रकरणे आढळून आली असून हे प्रमाण ११.८ टक्के इतके आहे. पुण्यानंतर रायगडमध्ये चार प्रकरणे आढळली. हे प्रमाण ५.९ टक्के इतके आहे. त्यापाठोपाठ नागपुरात तीन म्हणजे ४.४ टक्के प्रकरणे आढळली. त्यानंतर औरंगाबाद, कोल्हापूर आणि पालघर येथे प्रत्येकी दोन प्रकरणे आढळली. हे प्रमाण २.९ टक्के इतके आहेत. याबरोबरच नाशिक आणि अमरावती येथे प्रत्येकी एक म्हणजे १.५ टक्के प्रकरणे आढळली आहेत.