इराणी टोळ्यांवर पोलिसांचे लक्ष्य; मुंबईत लुटीच्या घटना वाढल्याने कारवाई तीव्र – Maharashtra Times

मुंबई : वृद्धांना चाकू किंवा अन्य शस्त्राचा धाक दाखवून तसेच अन्य वेगवेगळी कारणे सांगून लुटण्याच्या घटना मुंबईत खूप वाढल्या आहेत. यावर नियंत्रण मिळविण्यासाठी पोलिसांनी गोड बोलून दिशाभूल करणाऱ्या बोलबच्चन आणि विशेष करून इराणी टोळ्यांवर लक्ष्य केंद्रित केले आहे. मुंबई गुन्हे शाखेने आंबिवली गावात जाऊन इराणी टोळीच्या तिघांची धरपकड केली तर एका वृद्धास जुनी ओळख दाखवून लुटणाऱ्या तिघांना मुलुंड पोलिसांनी अटक केली. मुंबईतील वेगवेगळ्या पोलिस ठाण्यांमध्ये दाखल गुन्ह्यांमध्ये या आरोपींचा हात असल्याचे स्पष्ट झाले आहे.

ठाणे येथील मधुकर दळवी हे ६० वर्षीय सेवानिवृत्त गृहस्थ मुलुंड पश्चिम येथील सेवालाल रोड येथून चालत होते. याचवेळी तिघेजण त्यांच्या समोर आले आणि जुनी ओळख असल्याचे भासवून त्यांच्यासोबत बोलू लागले. बोलण्यात गुंतवून त्यांचे सोन्याचे ब्रेसलेट, गळ्यातील चेन आणि हातामधील अंगठ्या काढून घेत असताना दळवी यांनी विरोध करताच या तिघांनी त्यांना ठार मारण्याची धमकी दिली. दागिने घेऊन पसार झाल्यानंतर दळवी यांनी पोलिस ठाण्यात धाव घेतली. मुलुंड पोलिस ठाण्याचे सहायक निरीक्षक गणेश मोहिते, उपनिरीक्षक कांचन थोरात यांच्यासह कोळी, बोडके, वाळे, विंचू, पारधी, निकम आणि नलावडे यांच्या पथकाने सीसीटीव्हीच्या माध्यमातून या तिघांचा माग घेतला. नवी मुंबईतील महापे येथील एका लॉजमधून रमेश जयस्वाल, नरेश जयस्वाल, संजय मांगडे या तिघांना पोलिसांनी ताब्यात घेतले. या तिघांची गुन्हेगारी पार्श्वभूमी तपासली असता नवघर, पंतनगर, भोईवाडा, विलेपार्ले , बाजारपेठ कल्याण, डोंबिवली, अंबरनाथ, बांद्रा, सांताक्रूज, मुंबई सेंट्रल रेल्वे या ठिकाणी दाखल असलेल्या गुन्ह्यांमध्ये त्यांचा हात असल्याचे निष्पन्न झाले.

सूत्रधारास अखेर अटक

बोलण्यात गुंगवून चोरी करणाऱ्यांमध्ये सर्वाधिक प्रमाण हे कल्याणजवळील आंबिवली परिसरात राहणाऱ्या इराणी नागरिकांचे आहे. मुंबईतील एका गुन्ह्यामध्ये गुन्हे शाखेच्या मालमत्ता कक्षाच्या पथकाने एक इराणी पुरुष आणि एका महिलेला अटक केली होती. त्यांच्या चौकशीमध्ये आंबिवली येथे राहणाऱ्या इराणी नागरिक या टोळीचा प्रमुख असल्याचे समोर आले. त्यानुसार पोलिसांचे पथक आंबवली येथील वस्तीमध्ये या सूत्रधाराला पकडण्यासाठी गेले असता येथील रहिवाशांनी त्यांना विरोध केला. पोलिसांनी शक्कल लढवली. खासगी वेशात आणि मुंबईचे क्रमांक नसलेली वाहने घेऊन वस्तीबाहेर पोलिस दबा धरून बसले. काबुली नौशाद अली जाफरी हा टोळीप्रमुख वस्तीबाहेर येताच पोलिसांनी त्याच्या मुसक्या आवळल्या. जाफरी याच्याविरोधात ३६ गुन्ह्यांची नोंद असून चोरी आणि तोतया पोलिसप्रकरणी ९ गुन्हे उघडकीस आले असल्याची माहिती पोलिसांनी दिली.