ॲपवरून कोणतेही कर्ज घेतले नसतानाही वसुलीबाजांचा तगादा आणि त्यांनी केलेली बदनामी यामुळे तणावाखाली गेलेल्या संदीप कोरगावकर या तरुणाने गेल्या आठवड्यात गळफास लावून आत्महत्या केली. कर्ज घेतले नसल्याने फेडणार नाही असा पवित्रा संदीपने घेतल्यामुळे त्याची मॉर्फिंग केलेली छायाचित्रे आणि व्हिडीओ त्याच्या नातेवाईक आणि मित्रांना पाठविण्यात आले. ६ हजार रुपयांचे कर्ज वेळेत फेडले नाही म्हणून वांद्रे येथील तरुणाची अशाच प्रकारे बदनामी करण्यात आली. कुरारमध्येदेखील दोन गुन्हे दाखल करण्यात आले आहेत. इमिटेशन ज्वेलरीचे काम करणाऱ्या तरुणाने पगार उशिरा होणार असल्याने घराचे भाडे भरण्यासाठी ॲपवरून कर्ज घेतले. कर्ज म्हणून घेतलेली रक्कम व्याजासहित फेडल्यानंतरही त्याला फोन आणि संदेश येत होते. कर्जाची सर्व रक्कम पोच केल्यामुळे अधिक पैसे देण्यास नकार देताच त्याचीही वसुलीबाजांनी बदनामी सुरू केली. दुसऱ्या एका प्रकरणात बँकेचे कर्ज फेडण्यासाठी तरुणाने ॲपवरून ७ हजार रुपये कर्ज घेतले. हे कर्ज फेडले नाही तर बदनामी करण्याची धमकी ॲपसाठी वसुली करणाऱ्यांनी दिली.
अनेक ॲप बेकायदा कर्जवाटप करून मोठे व्याजदर आकारतात. तत्काळ कर्ज मिळत असल्याने अनेकजण कोणताही विचार न करता ॲप मोबाइलमध्ये डाउनलोड करून कर्ज घेतात. हे प्रकार दिवसागणिक वाढत असून सध्याचे बहुतांश गुन्हे मुंबईच्या उत्तर भागामध्ये घडले आहेत. संदीपप्रमाणे बदनामीला कंटाळून कुणी जीवाचे बरे-वाईट करू नये यासाठी पोलिसांनी या गुन्ह्यांची गंभीर दखल घेतली असून दहा पोलिसांचे एक पथक तयार करण्यात आले आहे. दाखल झालेले गुन्हे उघडकीस आल्यावर यामध्ये नेमके कोण आहे हे उजेडात येईल, अशी माहिती एक अधिकाऱ्याने दिली.
विचार करा, संयम बाळगा
कोणत्याही ॲपवरून कर्ज घेण्यापूर्वी गांभीर्याने विचार करा. झटपट पैसे मिळतात म्हणून काहीही चुकीचे करू नका. बदनामीसाठी व्हायरल केली जाणारी छायाचित्र अथवा व्हिडीओ मॉर्फिंग केलेले असतात. असे व्हिडीओ, छायाचित्रे कुणी व्हायरल केल्यास तक्रार करा, जिवाचे बरे-वाईट करण्याचे पाऊल उचलू नका, असे आवाहन पोलिसांनी केले आहे.
Source: https://maharashtratimes.com/maharashtra/mumbai-news/mumbai-police-has-formed-a-team-to-search-for-the-accused-who-are-defaming-for-debt-recovery/articleshow/91480236.cms
