IPL 2022 : मुंबई : मुंबई इंडियन्सच्या संघाने हार्दिक पंड्याला रिटेन केले नाही आणि त्याला आता अहमदाबादच्या संघाने कर्णधार बनवले आहे. मुंबई इंडियन्सचा संघ सोडल्यावर हार्दिकचा सूरही बदलल्याचे पाहायला मिळाले. तसेच अहमदाबाद फ्रँचायझीने या अष्टपैलू खेळाडूला त्यांच्या संघाचा कर्णधार बनवले आहे, याची अधिकृत घोषणा करण्यात आली आहे. अहमदाबादमध्ये दाखल झाल्यानंतर हार्दिकचा मुंबई इंडियन्ससोबतचा सात वर्षांचा प्रवास संपुष्टात आला आहे. हार्दिक पंड्याने नव्या संघासोबत डावाची सुरुवात करण्यापूर्वी चाहत्यांना एक खास संदेश सोशल मीडियावरून दिला आहे. दिला आहे.आयपीएल २०२२ मध्ये दोन नवे संघ सहभागी होणार आहेत. या नव्या दोन्ही संघांनी आपापले कर्णधार निवडले आहेत. मुंबई इंडियन्सकडून दीर्घकाळ आयपीएलमध्ये खेळलेला भारताचा अष्टपैलू खेळाडू हार्दिक पंड्या आगामी हंगामात अहमदाबाद संघाकडून खेळताना दिसणार आहे.
पंड्याने आपल्या ट्विटर अकाऊंटवरून एक व्हिडिओ शेअर केला आहे, ज्यामध्ये त्याने म्हटले आहे की, नवीन आयपीएल संघ अहमदाबादसोबत आपला प्रवास सुरू करण्यासाठी तो खूप उत्सुक आहे. आयपीएलच्या नव्या संघाचा कर्णधार म्हणून त्याच्यावर विश्वास दाखवणाऱ्या मालकांचेही त्याने आभार मानले आहेत. तसेच संघात निवडलेल्या शुभमन गिल आणि राशिद खान या आणखी दोन खेळाडूंचेही त्याने स्वागत केले.
दरम्यान, अहमदाबादने हार्दिक पंड्या आणि युवा शुभमन गिल यांची भारतीय खेळाडू म्हणून निवड केली आहे, तर अफगाणिस्तानचा दिग्गज फिरकीपटू राशिद खान हा परदेशी खेळाडू म्हणून निवडला आहे. हार्दिक आणि राशिद खान यांना प्रत्येकी १५ कोटी, तर गिलला ८ कोटी देण्यात येणार आहेत.
यापूर्वी सनरायझर्स हैदराबादकडून खेळलेला राशिद खान सनरायझर्स हैदराबादकडून ७६ सामने खेळला होता आणि ६.३३ च्या इकॉनॉमी रेटने ९३ विकेट्स घेतल्या होत्या. दुसरीकडे, शुभमन गिल हा कोलकाता नाइट रायडर्स संघाचा भाग होता. गिलने ५८ सामन्यांमध्ये संघाचे प्रतिनिधित्व केले आणि १० अर्धशतकांसह ३१.४८ च्या सरासरीने १४१७ धावा केल्या आहेत.
Source: https://maharashtratimes.com/sports/cricket/iplt20/news/ipl-2022-ahmedabad-pick-hardik-pandya-as-captain-rashid-khan-and-shubman-gill-roped-for-new-season/articleshow/89056926.cms
