Maharashtra Lockdown Soon : पुन्हा लॉकडाउनचे संकेत, मुंबई लोकल आणि शाळा-कॉलेजसंदर्भात लवकरच… – Maharashtra Times

मुंबई: मुंबईसह संपूर्ण महाराष्ट्रात करोना (Corona) आणि नवीन व्हेरियंट ओमिक्रॉन (Omicron) रुग्णांच्या संख्येत वाढ होत आहे. त्यामुळे राज्य सरकार आणि आरोग्य विभागाची चिंता वाढली आहे. रुग्णसंख्या अशीच वाढत राहिली तर, राज्यात पुन्हा लॉकडाउन लावला जाऊ शकतो, असे संकेत महाविकास आघाडी सरकारमधील मंत्र्यांनी दिले आहेत. मुंबई आणि राज्यातील सद्यपरिस्थिती बघता, आज किंवा उद्यापर्यंत शाळा, महाविद्यालये खुली ठेवण्यासंदर्भात आणि मुंबई लोकलसंदर्भात महत्वाचा निर्णय होण्याची शक्यता आहे.

मिळालेल्या माहितीनुसार, आज, सोमवारी (३ जानेवारी) मुंबई महापालिका (BMC) अधिकाऱ्यांची महत्वाची बैठक होणार आहे. मुंबईतील वाढती रुग्णसंख्या बघता, राज्याचे मंत्री विजय वडेट्टीवार यांनीही मुंबई लोकलसंदर्भात लवकरच कठोर निर्णय घेतला जाण्याची शक्यता असल्याचे संकेत दिले आहेत. त्यांनी पश्चिम बंगालप्रमाणे मिनी लॉकडाउन लागू करण्याची शक्यता असल्याचे संकेत दिले आहेत. आरोग्य मंत्री राजेश टोपे यांनी नुकतेच करोनासंबंधीचे नियम स्पष्ट केले आहेत. ऑक्सिजनची गरज ७०० मेट्रिक टनपर्यंत पोहोचली तर, राज्यात आपसुकच लॉकडाउन लावण्यात येईल, असे ते म्हणाले होते. या संदर्भात अंतिम निर्णय हे राज्याचे मुख्यमंत्री उद्धव ठाकरे हे घेतील, असेही ते म्हणाले.

अजित पवार यांनीही दिले लॉकडाउनचे संकेत

उपमुख्यमंत्री अजित पवार यांनीही आज साताऱ्यात पत्रकारांशी बोलताना राज्यात लॉकडाउन लागू केले जाण्याची शक्यता आहे, असे संकेत दिले आहेत. करोना संसर्ग असाच वाढत राहिला तर, राज्य सरकारला कठोर निर्णय घ्यावा लागेल, यासंदर्भात मुख्यमंत्री जे निर्णय घेतील, ते राज्याच्या सर्व भागांत लागू करण्यात येतील, असे त्यांनी सांगितले.

Corona Booster Dose: महाराष्ट्रात करोनाच्या संभाव्य तिसऱ्या लाटेचा धोका, बुस्टर डोससाठी…
Omicron In Mumbai: संपर्कवाढीमुळे ओमिक्रॉनचा संसर्ग; परदेशवारी नसलेलेही बाधित होत असल्याने चिंता

शाळा-महाविद्यालये, मुंबई लोकलसंदर्भात आज किंवा उद्या निर्णय होण्याची शक्यता

राज्याचे मंत्री विजय वडेट्टीवार यांनी यासंदर्भात बोलताना सांगितले आहे की, राज्यात पश्चिम बंगालप्रमाणे लॉकडाउन लागू केले जाण्याची शक्यता व्यक्त केली आहे. ते म्हणाले की, पश्चिम बंगालमध्ये शाळा, महाविद्यालये बंद करण्याचा निर्णय घेण्यात आलेला आहे. आपल्या राज्यातही करोना आणि ओमिक्रॉन संसर्ग वेगाने वाढत आहे. या परिस्थितीबाबत मुख्यमंत्री उद्धव ठाकरे यांच्याशीही चर्चा झाली आहे. अंतिम निर्णय तेच घेतील, असे वडेट्टीवार म्हणाले. राज्याच्या काही भागांना कंटेन्मेंट झोन घोषित करून प्रवेश बंदी केली जाऊ शकते, हा एक पर्याय असू शकतो. होणाऱ्या गर्दीला नियंत्रित करण्यासाठी कठोर नियम लागू केला जाऊ शकतो. मुंबई लोकलमध्ये होणाऱ्या गर्दीसंदर्भात मुख्यमंत्री गंभीर आहेत. कॅबिनेट आणि टास्क फोर्सच्या बैठकीत पश्चिम बंगालप्रमाणे अंशतः लॉकडाउनसारखा निर्णय घेतला जाऊ शकतो, असेही संकेत त्यांनी दिले आहेत.