म. टा. खास प्रतिनिधी मुंबई
नार्कोटिक्स कंट्रोल ब्युरोकडून एका बाजूला बॉलीवूड आणि सेलिब्रीटी यांची धरपकड सुरू असताना, दुसरीकडे पोलिसांनी मुंबईची ड्रगसफाई सुरु केली आहे. मुंबई पोलिस आणि अमली पदार्थ विरोधी पथकाने चालू वर्षात पहिल्या आठ महिन्यांत तब्बल तीन हजार ५७५ आरोपींना अटक केली असून त्यांच्याकडून तब्बल ८७ कोटींचे अमली पदार्थ हस्तगत करण्यात आले आहेत. अमली पदार्थ तस्करीची साखळी तोडण्यासाठी ड्रग्ज पुरवठादारांपासून ते व्यसन करण्यापर्यंत सर्व पातळीवरील आरोपींना पकडण्यावर पोलिसांनी भर दिला आहे.
मुंबई पोलिस, गुन्हे शाखा तसेच अमली पदार्थविरोधी पथकाच्या वतीने मुंबईत ड्रग्जची तस्करी, विक्री तसेच सेवन करणाऱ्यांवर बारीक नजर ठेवली जात आहे. त्यातच मुंबई देशाची आर्थिक राजधानी असून गरिबांपासून उच्चवर्गीयांपर्यंत सर्व स्तरातील लोकांचे वास्तव्य आहे. त्यामुळे ड्रग तस्करांचा या शहराकडे अधिक ओढा असतो. मुंबईत बस, रेल्वे, समुद्र अशा वेगवेगळ्या मार्गांनी अमली पदार्थ आणले जातात. तरुण पिढी या ड्रगच्या आहारी जात असून ड्रग तस्कर अमली पदार्थांच्या विक्रीतून कोट्यवधी रुपये कमवितात. हे सर्व थांबविण्यासाठी तसेच अमली पदार्थमुक्त समाज निर्माण करण्यासाठी मुंबई पोलिसांनी धडक कारवाई सुरू केली आहे. चालू वर्षात अमली पदार्थविरोधी पथकाने ड्रग संदर्भात ८८ गुन्हे दखल केले असून १२९ आरोपींना अटक केली आहे. या आरोपींकडून सुमारे ६० कोटी रुपयांचे ड्रग हस्तगत करण्यात आले आहे. दुसरीकडे, मुंबईत ९४ पोलिस ठाणी असून या सर्व पोलिसांनी या वर्षी पहिल्या आठ महिन्यात तीन हजार २४५ गुन्हे दाखल करून तीन हजार ४४६ जणांना अटक केली आहे. अटक केलेल्या आरोपींकडून पोलिसांनी सुमारे २७ कोटींचे अमली पदार्थ हस्तगत केले आहेत.
तीन वर्षातील आकडेवारी
वर्ष गुन्हे आरोपी ड्रग्ज किंमत (रु.)
२०१९ ५१४ ५९५ ७१६ किलो ६७.१४ कोटी
२०२० ४१४ ४८० १,०२३ किलो २८.५९ कोटी
२०२१ ४४३ ५५७ ३,८३५ किलो ८६.७१ कोटी
हस्तगत करण्यात आलेले ड्रग्ज
पोलिसांनी हस्तगत केलेल्या ड्रगमध्ये सर्वच प्रकारच्या अमली पदार्थांचा समावेश आहे. कोकेन, हेरॉइन, चरस, एमडी, गांजा याचबरोबर एलसीडी डॉट्स, नशेच्या गोळ्या तसेच मोठ्या प्रमाणात कफ सिरपचा साठादेखील पोलिसांनी जप्त केला आहे.
मुंबईत येणारा ड्रग पुरवठा रोखणे आणि त्यामागील साखळी तोडणे हा आमचा मुख्य उद्देश आहे. त्यादृष्टीने पोलिस ठाण्यांचे अधिकारी तसेच अमली पदार्थ विरोधी पथके कार्यरत असून दाखल गुन्हे, अटक आरोपींची संख्या आणि विशेष म्हणजे मोठ्या प्रमाणात जप्त करण्यात आलेल्या ड्रगवरून धडक कारवाईची कल्पना येते. मुंबईला ड्रगमुक्त करण्यासाठी ही कारवाई यापुढेही अशीच सुरू ठेवली जाणार आहे.
– मिलिंद भारंबे, पोलिस सहआयुक्त, गुन्हे शाखा
Source: https://maharashtratimes.com/maharashtra/mumbai-news/mumbai-police-and-anti-narcotics-squad-have-arrested-3575-accused-this-year-and-seized-drugs-worth-rs-87-crore/articleshow/86883367.cms
