Mumbai Rains : मुंबई, ठाणे परिसरात मुसळधार पाऊस; लोकल सेवेवरही परिणाम! – Maharashtra Times

मुंबई : मुंबई शहरासह ठाणे आणि नवी मुंबईत जोरदार पावसाने (Mumbai Rain Updates) हजेरी लावली आहे. मुसळधार पावसामुळे लोकल सेवेचाही काही काळासाठी खोळंबा झाला. ऐरोली स्थानकाजवळ ओव्हरहेड वायरमध्ये तांत्रिक बिघाड झाल्याने या मार्गावरील लोकल सेवा थांबवण्यात आली होती. साधारण ८.१५ च्या सुमारास दुरुस्तीनंतर ही सेवा पूर्ववत करण्यात आली.

ठाणे, नवी मुंबईत मागील ३ तासांपासून विजांच्या कडकडाटासह पाऊस कोसळत आहे. काही भागात ७० ते १०० मिमी आणि बर्‍याच ठिकाणी ४०-७० मिमी दरम्यान पाऊस झाल्याची माहिती हवामान खात्याकडून देण्यात आली आहे.

Maharashtra Bandh: लखीमपूर घटनेवर महाविकास आघाडी आक्रमक; ‘या’ तारखेला महाराष्ट्र बंद

संध्याकाळी ५.३० ते ७ च्या दरम्यान ठाणे, रायगड जिल्ह्यात खूप तीव्र १०-१२ किमी उंचीचे ढग होते. ज्यामुळे या परिसरात जोरदार पाऊस पडला. मुंबईमध्येही त्याचा प्रभाव जाणवला.

पुण्यातही पावसाचा धुमाकूळ

पुणे आणि परिसरात मागील ३ तासांत मध्यम ते जोरदार स्वरुपाचा पाऊस झाला. शहरात ढगांच्या गडगडाटासह आणि विजांच्या कडकडाटासह पाऊस बरसला.

परतीच्या पावसाला सुरुवात

मान्सूनच्या परतीच्या प्रवासाला आज ६ ऑक्टोबर पासून राजस्थान आणि गुजरातच्या काही भागातून सुरुवात झाली आहे. गुजरातच्या काही भागातून, पूर्ण राजस्थान, पंजाब, हरियाणा, चंदीगड, दिल्ली, जम्मू-काश्मीर, लडाख, हिमाचल प्रदेश, उत्तराखंड, उत्तरप्रदेश, मध्यप्रदेशचा काही भाग असा भाग परतीच्या पावसासाठी पुढील २४ तास अनुकूल असल्याचं हवामान खात्याकडून सांगण्यात आलं आहे.