हायलाइट्स:
- गुजरातमध्ये २१ हजार कोटींचे हेरॉइन जप्त
- मुंबईतही कस्टम विभागाची कारवाई
- आई आणि मुलीकडून २५ कोटींचे अमली पदार्थ जप्त
मुंबईः मुंबई विमानतळावर कस्टम विभागानं मोठी कारवाई केली आहे. दोन परदेशी नागरिकांकडून २५ कोटी किंमतीचे ड्रग्स जप्त करण्यात आले आहेत. या प्रकरणी या दोघांना अटक करण्यात आली आहे.
जोहान्सबर्ग येथून आलेल्या दोन महिलांकडून हे अमली पदार्थ जप्त करण्यात आले आहेत. कस्टम विभागानं तब्बल ४. ९५ किलो हेरॉइन या दोन महिलांकडून जप्त केलं आहे. सूत्रांनुसार, या आई व मुलगी जोहान्सबर्ग येथून मुंबईला आल्या होत्या. कतार एअरलाइन्समधून त्यांनी जोहान्सबर्ग- मुंबई प्रवास केला होता. तसंच, फुफ्फुसाच्या कर्करोगावर उपचार करण्याचं कारण देत त्या भारतात आल्या होत्या, अशी माहिती सूत्रांनी दिली आहे.
वाचाः ‘रिया चक्रवर्तीकडे २ ग्रॅम हेरॉइन सापडल्यावर भंडावून सोडणारे आता गप्प का?’
कस्टम विभागाच्या अधिकाऱ्यांनी दिलेल्या माहितीनुसार, हे हेरॉईन भारतात आणण्यासाठी दोन्ही प्रवाशांना प्रत्येकी ५ हजार डॉलर देण्यात आले होते. दोन्ही आरोपींना न्यायालयात हजर केले असता त्यांना ५ ऑक्टोबरपर्यंत न्यायालयीन कोठडी सुनावण्यात आली आहे. तसंच, हे ड्रग्ज ते कोणाकडे सोपवण्यासाठी भारतात आणले होते. याचीही चौकशी करण्यात येत आहे. तसंच, अलीकडे गुजरातमध्येही २१ हजार कोटी रुपये मूल्याचे हेरॉइन गुजरातच्या मुंद्रा बंदरातून जप्त करण्यात आले आहे. त्या अनुषगांनेही या प्रकरणाचा तपास करण्यात येत आहे.
वाचाः ‘सामना’ रंगणार; चंद्रकांत पाटलांविरोधात संजय राऊत ठोकणार सव्वा रुपयांचा दावा
गुजरातमध्ये ड्रग्ससाठा जप्त
अफगाणिस्तानातून समुद्रमार्गे भारतात पोहोचलेले तब्बल २१ हजार कोटी रुपये मूल्याचे हेरॉइन गुजरातच्या मुंद्रा बंदरातून जप्त करण्यात आले आहे. आत्तापर्यंतच्या अंमली पदार्थांच्या तस्करीतील हे सर्वांत मोठे घबाड समजले जात आहे. गुजरातमधील मुंद्रा बंदरावर पकडलेल्या सुमारे तीन हजार किलो हेरॉइनच्या तस्करीप्रकरणी ईडीने मनी लाँडरिंगचा गुन्हा दाखल केला. या प्रकरणी दोघांना अटक करण्यात आली. महसूल गुप्तचर विभागाने ही कारवाई केली. विजयवाडा येथील आशी ट्रेडिंग कंपनीने अर्धवट प्रक्रिया केलेले पावडरचे खडे अफगाणिस्तानातून मागवले. आंध्र पोलिसांनी मात्र या प्रकरणाचा विजयावाड्याशी संबंध नसल्याचे म्हटले आहे. कंटेनरवरील पत्ता विजयवाडा येथील असला, तरीही संबंधित पत्त्यावर कोणतीही बेकायदा कृती आढळली नसल्याचे आंध्र पोलिसांनी सांगितले.
वाचाः ईडीचा अनुभव कधीपासून आला म्हणणाऱ्या शिवसेनेला चंद्रकांत पाटलांचे प्रत्युत्तर; म्हणाले…
Source: https://maharashtratimes.com/maharashtra/mumbai-news/mumbai-custom-department-arrests-two-foreign-nationals-with-heroin-of-worth-twenty-five-crore-at-mumbai-airport/articleshow/86419793.cms
