मुंबईतील झोपडपट्ट्यांमधील प्रादुर्भाव कमी होतोय; आता फक्त ४१ प्रतिबंधित क्षेत्रे – Maharashtra Times

म. टा. विशेष प्रतिनिधी, मुंबई

मुंबईतील करोनाचा संसर्ग नियंत्रणात येत चालल्याने प्रतिबंधित क्षेत्रांची संख्या झपाट्याने खाली येऊ लागली आहे. मुंबईत सध्या फक्त ४१ प्रतिबंधित क्षेत्रे शिल्लक असून त्यात ५५ हजार घरे आहेत. या घरांमध्ये सुमारे दोन लाख ५३ हजार नागरिकांचे वास्तव्य आहे. सर्वाधिक १२ प्रतिबंधित क्षेत्रे कांदिवली परिसरात आहेत.

झोपडपट्ट्यांमध्ये करोनाचा संसर्ग वाढल्यामुळे काही महिन्यांपूर्वी प्रतिबंधित क्षेत्रांची संख्या दोन हजार ८०० वर पोहचली होती. गेल्या महिनाभरापासून झोपडपट्ट्या व अन्य दाटीवाटीच्या वस्तीतील रुग्णांची संख्या कमी झाल्यामुळे प्रतिबंधित क्षेत्रांची संख्या कमी होऊ लागली आहे. करोनाचा सर्वाधिक प्रादुर्भाव असलेल्या परिसर प्रतिबंधित क्षेत्र म्हणून घोषित करण्यात येतो. झोपडपट्ट्यांमध्ये संसर्ग वाढू नये यासाठी पालिकेने मोठ्या प्रमाणात उपाययोजना हाती घेतल्या आहेत.

शौचालयाची दररोज चार ते पाच वेळा स्वच्छता, करोनाचा रुग्ण सापडल्यानंतर त्याच्या संपर्कात आलेल्या रुग्णांचा शोध घेऊन त्यांना अलगीकरण करणे यावर भर देण्यात आला. त्यामुळे चाळी आणि झोपडपट्ट्यांमधील प्रादुर्भाव कमी होत गेला आहे.

मुंबईच्या विविध भागांतील प्रतिबंधित क्षेत्रे कमी होत असून पालिकेच्या कांदिवली आर दक्षिण विभागात सर्वाधिक १२ प्रतिबंधित क्षेत्रे आहेत. अंधेरी के पूर्व विभागात आठ तर ई विभाग भायखळा पाच, भांडुप एस विभाग चार तर चेंबूर एम पश्चिम विभागात तीन प्रतिबंधित क्षेत्रे शिल्लक आहेत.

दादर, प्रभादेवीत शून्य क्षेत्रे

पहिल्या लाटेत करोनाचा हॉटस्पॉट ठरलेल्या प्रभादेवी जी-दक्षिण व दादर जी-उत्तर या विभागात शून्य प्रतिबंधित क्षेत्रे आहेत. या विभागात येणाऱ्या वरळी कोळीवाड्यासह धारावी झोपडपट्टी परिसरात एकही प्रतिबंधित क्षेत्र नाही. मुंबईतील पालिकेचे ११ विभाग प्रतिबंधित क्षेत्रमुक्त झाले आहेत. यामध्ये दक्षिण मुंबईसह मध्य मुंबई, अंधेरी पश्चिम, गोरेगाव, मालाड व बोरीवली विभागांचा समावेश आहे.