हायलाइट्स:
- मुंबई पोलिसांचे महत्तवपूर्ण आदेश
- खासगी आस्थापनांना सीसीटीव्ही सक्ती
- गुन्ह्यांच्या तपासात वेग आणण्यासाठी उचललं पाऊल
मुंबई : बृहन्मुंबई पोलिस आयुक्तालयाच्या कार्यक्षेत्रातील खाजगी आस्थापनावर सी. सी. टी. व्ही. कॅमेरा लावण्यासंदर्भात मुंबई पोलिसांनी (Mumbai Police) आदेश निर्गमित केले आहेत. या आदेशाची तातडीने अंमलबजावणी करावी, असे निर्देश पोलिस उपआयुक्त (ऑपरेशन) तथा कार्यकारी दंडाधिकारी एस. चैतन्य यांनी दिले आहेत.
पोलिस तपास तसेच गुन्हा नियंत्रण व गुन्ह्यांची उकल होण्यासाठी सी.सी.टी.व्ही फुटेजचा मोठा उपयोग होऊ शकतो. त्या संदर्भात खाजगी आस्थापनाने सी.सी.टी.व्ही. लावावेत असे निर्देश देण्यात आले होते. त्यानुसार अद्यापही काही खाजगी आस्थापनांनी सी.सी.टी.व्ही. कॅमेरा लावलेला नाही.
मुंबईत सीसीटीव्ही लावणं कोणासाठी बंधनकारक?
1) बँक, 2) एटीएम, 3) वित्तीय संस्था, 4) ज्वेलरी शॉप, 5) हॉटेल, 6) विश्राम गृह, 7) रेस्टॉरंट, 8) बार व पब, 9) वाईन व बियर शॉप, 10) निवासी संकूल, 11) कार्यालय इमारत, 12) नवीन तसेच बांधकामाधीन निवासी संकूल/कार्यालय, 13) पेट्रोलपंप, 14) शॉपिंग मॉल, 15) शॉपिंग कॉम्प्लेक्स, 16) सुपर मार्केट, 17) जिम, 18) खेळाची मैदाने, 19) चित्रपटगृह व कॉम्पलेक्स, 20) शैक्षणिक संकूल, 21) प्रार्थना स्थळे, 22) दवाखाने, 23) पुतळ्यांच्या सुरक्षा व देखभालीसाठी नेमलेल्या संस्था/संघटना यात आदींचा समावेश आहे.
या खाजगी आस्थापनांनी साधारणत: 50 मीटर पर्यंतचा त्यांचा परिसर रेकॉर्ड होईल असे कॅमेरे लावावेत. तसंच ते सुस्थितीत असतील याची खात्री करावी. त्याची चित्रीकरण यंत्रणा उत्तम प्रतिची तसेच कमीत कमी 15 दिवसांचे रेकॉर्डींग होईल अशी असावी. पोलिसांनी मागणी केल्यास सदरील रेकॉडींग पोलिसांना द्यावे. तसेच काही संशयास्पद आढळून आल्यास त्याची कल्पना जवळच्या पोलिस स्टेशनला द्यावे. सदरील निर्देश दि.12 मे 2021 ते 10 जुलै 2021 या कालावधीसाठी आहेत, असेही मुंबई पोलिसांनी आपल्या आदेशात म्हटलं आहे.
Source: https://maharashtratimes.com/maharashtra/mumbai-news/mumbai-police-issued-important-orders-to-private-offices-hotels-bars-and-malls/articleshow/82770695.cms
