हायलाइट्स:
- मुंबई बॉम्बस्फोटातील आरोपी कमाल अन्सारीचा करोनाने मृत्यू.
- नागपूर मेडिकल कॉलेज हॉस्पिटलमध्ये सुरू होते उपचार.
- बॉम्बस्फोट खटल्यात सुनावण्यात आली होती फाशीची शिक्षा.
नागपूर: मुंबईतील साखळी बॉम्बस्फोट प्रकरणात फाशीची शिक्षा झालेल्या आरोपीचा करोनामुळे मृत्यू झाला. कमाल अहमद मोहम्मद वकील अन्सारी (रा. बिहार),असे मृताचे नाव आहे. ( Mumbai Bomb Blast Aaccused Dies Of Coronavirus )
वाचा: नागपूरला १० हजार रेमडिसीवीर द्या; महत्त्वपूर्ण आदेशात हायकोर्ट म्हणाले…
मुंबई येथे २००६ मध्ये रेल्वेत साखळी बॉम्बस्फोट घडवण्यात आले होते. या प्रकरणात कमालसह अन्य आरोपींना फाशीची शिक्षा झाली आहे. २०१५ मध्ये कमाल याची नागपूर कारागृहात रवानगी करण्यात आली. कमाल याला विशेष सेलमध्ये ठेवण्यात आले आहे. ८ एप्रिल रोजी कारागृह प्रशासनाने कैद्यांची करोना चाचणी केली असता ९ एप्रिलला त्याचा अहवाल आला. त्यात कमाल याच्यासह आठ जण पॉझिटिव्ह असल्याचे निष्पन्न झाले होते. कारागृह प्रशासनाने कमाल याला मेडिकल कॉलेज हॉस्पिटलमध्ये दाखल केले होते. तिथे उपचारादरम्यान आज त्याचा मृत्यू झाला. याप्रकरणी धंतोली पोलिसांनी आकस्मिक मृत्यूची नोंद केली आहे.
वाचा: नागपूरमध्ये मृत्यूचे तांडव, एकाच दिवशी ११३ करोनाबळी; परिस्थिती हाताबाहेर
नागपुरात आज ११३ मृत्यूंची नोंद
नागपूर जिल्ह्यात करोना संसर्गाची स्थिती भीषण बनली आहे. जिल्ह्यात आज दिवसभरात ११३ मृत्यूंची नोंद करण्यात आली. हा आतापर्यंतचा एका दिवसातील सर्वाधिक आकडा ठरला आहे. दुसरीकडे जिल्ह्यात आज आणखी ६ हजार ३८६ बाधितांची भर पडल्याने आरोग्य यंत्रणा हादरली आहे. करोना संसर्गाच्या दुसऱ्या लाटेत मृत्यूचे वाढते प्रमाण रोखण्यात आरोग्य यंत्रणेला अपयश येत आहे. गेल्या काही दिवसांपासून जिल्ह्यात दररोज ५० हून अधिक मृत्यूची नोंद करण्यात येत आहे. गेल्या १९ दिवसांमध्ये जिल्ह्यात १२०० हून अधिक मृत्यू नोंदवण्यात आले. आज जिल्ह्यात पहिल्यांदाच मृत्यूच्या आकड्याने शंभरी पार केली. यात शहरात ७५ तर ग्रामीणमध्ये ३२ आणि जिल्ह्याबाहेरील ६ रुग्णांच्या मृत्यूचा समावेश आहे. जिल्ह्यात करोनाने आतापर्यंत तब्बल ६ हजार ३८६ जणांचा बळी घेतला आहे.
वाचा: राज्यात कडक लॉकडाऊनबाबत दोन दिवसांत निर्णय?; ‘हा’ मंत्री म्हणाला…
Source: https://maharashtratimes.com/maharashtra/nagpur/mumbai-bomb-blast-accused-dies-of-coronavirus/articleshow/82149462.cms
