Mumbai Local Train: मुंबईत लोकलसेवा पूर्ण बंद करणार का?; वडेट्टीवार यांनी दिली महत्त्वाची माहिती – Maharashtra Times

मुंबई:करोना संसर्गाचा वाढता धोका लक्षात घेऊन राज्यात वीकेंड लॉकडाऊन आणि इतर दिवशी कठोर निर्बंध लादण्यात आले असून मुंबई पालिका क्षेत्रातही या निर्बंधांची काटेकोरपणे अंमलबजावणी करण्यात येत आहे. मात्र, लोकलमधील गर्दी कमी होत नसल्याने राज्य सरकारची डोकेदुखी वाढली असून यावर येत्या काही दिवसांत महत्त्वाचा निर्णय घेतला जाणार असल्याचे स्पष्ट संकेत राज्याचे मदत आणि पुनर्वसन मंत्री विजय वडेट्टीवार यांनी दिले आहेत. ( Mumbai Local Train Latest News )

वाचा: राज्यातील ‘या’ जिल्ह्यात केंद्रीय पथक; करोनाच्या तिसऱ्या लाटेचा दिला इशारा!

गेल्यावर्षी मार्च महिन्यात देशात लॉकडाऊन लागू करण्यात आल्यानंतर मुंबईतील लोकलसेवा पूर्णपणे ठप्प झाली होती. मुंबईकरांची लाइफलाइन असलेल्या लोकलसेवेसाठी तो अभूतपूर्व असा काळ ठरला होता. दरम्यान, राज्य सरकारच्या विनंतीवरून नंतर अत्यावश्यक सेवेत काम करणाऱ्या कर्मचाऱ्यांसाठी लोकलची विशेष सेवा सुरू करण्यात आली. करोना नियंत्रणात येऊ लागल्यानंतर या सेवेचा टप्प्याटप्प्याने विस्तार करण्यात आला. सध्या वेळेचे बंधन घालून सर्वच प्रवाशांना लोकलने प्रवास करण्याची मुभा देण्यात आलेली आहे. मात्र गेले काही दिवस करोनाने पुन्हा एकदा डोके वर काढल्याने व रोजची आकडेवारी नवे उच्चांक गाठत असल्याने स्थिती गंभीर बनत चालली आहे.

वाचा: ‘निवडणुका आहेत तिथे करोना शांत बसलाय, तो लससाठा महाराष्ट्राला द्या!’

राज्य सरकारने करोनाचा वाढता धोका लक्षात घेवून वीकेंड लॉकडाऊन आणि अन्य दिवशी कठोर निर्बंध लावले आहेत. मुंबई पालिका क्षेत्रातही त्याला अनुसरून गाइडलाइन्स जारी करण्यात आलेल्या आहेत. यात लोकलसेवेसह बस, रिक्षा, टॅक्सी व अन्य प्रवासी सेवा सुरू ठेवण्यात आल्या आहेत. मात्र, सार्वजनिक वाहतूक सेवेतील गर्दी कमी होत नसल्याने राज्य सरकारपुढे मोठा प्रश्न उभा ठाकला आहे. याबाबत आज मंत्री विजय वडेट्टीवार यांना माध्यमांनी प्रश्न विचारला असता त्यांनी महत्त्वाची माहिती दिली. सामान्यांचा रोजगार बुडत असल्याचे लक्षात घेऊन लोकल सर्वांसाठी खुली करण्याची परवानगी आम्ही दिली होती. मात्र, मुंबई आणि परिसरात ज्या वेगाने करोना रुग्ण वाढत आहेत ते पाहता लोकलमधील गर्दी कमी करणे आवश्यक आहे. त्यातूनच लोकल पूर्ण बंद करावी की पूर्वी जसे कठोर निर्बंध घातले होते तसे पुन्हा घालावेत, यावर राज्य सरकार गंभीरपणे विचार करत आहे, असे वडेट्टीवार यांनी सांगितले.

वाचा: करोना हा रोग नाही, जे मरताहेत ते जगण्याच्या लायक नाहीत!: संभाजी भिडे