मुंबई : मायानगरी मुंबईत घरांच्या किमती कमी झाल्याचे एका अहवालातून समोर आले आहे. डिसेंबरच्या तिमाहीत मुंबईतील घरांच्या किमती सरासरी ३.२ टक्क्यांनी कमी झाल्याचे नाईट फ्रॅंक या संस्थेने म्हटलं आहे. जगातील आघाडीच्या १५० प्रमुख शहरांमध्ये मुंबई १४४ व्या स्थानी आहे.करोना संकट, लॉकडाउन, अनिश्चितता आणि मागणी कमी असल्याने घरांच्या किमतीत घसरण झाल्याचा परिणाम असल्याचे बोलले जाते.
अर्थव्यवस्था तेजीत ; ‘जीएसटी’ने ओलांडला मार्चमध्ये ऐतिहासिक टप्पा, चार वर्षांत प्रथमच विक्रमी कर संकलन
‘नाईट फ्रॅंक ग्लोबल रेसिडेन्शिअल सिटीज इंडेक्स’ २०२० मधील चौथ्या तिमाहीचा अहवाल जाहीर झाला आहे. ज्यात केवळ भारतात हैदराबाद या शहरात २०२० मध्ये घरांच्या किमतीत वाढ झाली असल्याचे म्हटलं आहे. २०२० च्या चौथ्या तिमाहीत हैदराबादमधील घरांच्या किमती ०.२ टक्क्यांनी वाढल्याचे दिसून आले आहे. त्यानुसार ‘नाईट फ्रॅंक ग्लोबल रेसिडेन्शिअल सिटीज इंडेक्स’मध्ये हैदराबाद शहर १२२ व्या स्थानी आहे.
सोने महागले ; सलग दुसऱ्या दिवशी तेजी, ७०० रुपयांची झाली वाढ
२०२० हे वर्ष करोना संकट आणि लॉकडाउन याने प्रभावित होते. त्याचा मोठा फटका अर्थव्यवस्थेतील सर्वच क्षेत्रांना बसला. काही शहरांमध्ये बड्या विकासकांनी ग्राहकांना आकर्षीत करण्यासाठी सवलती जाहीर केल्या होत्या. मात्र घरांच्या किमतीत फार मोठी घसरण झालेली नव्हती. महाराष्ट्रात राज्य सरकारने गृहनिर्माण क्षेत्राला चालना देण्यासाठी मुद्रांक शुल्कात कपात केली होती.
रात्रीस खेळ चाले ! रात्रीच घेतलेला निर्णय उजाडताच घेतला मागे, केंद्र सरकारमधील ताळमेळ बिघडला
घरांच्या किमती कमी झालेल्या शहरात मुंबईसह चेन्नईचा देखील समावेश आहे. डिसेंबरच्या तिमाहीत चेन्नईत घरांच्या किमतीत सरासरी ९ टक्के घरं झाली आहे. चेन्नई शहर ‘नाईट फ्रॅंक ग्लोबल रेसिडेन्शिअल सिटीज इंडेक्स’मध्ये १५० व्या स्थानी आहे.
बंगळुरुमध्ये घरांच्या किमतीत ०.८ टक्के घसरण झाली आहे. बंगळुरु या यादीमध्ये १२९ व्या स्थानी आहे. अहमदाबादमधील किमतीत ३.१ टक्के घसरण झाली असून ते १४३ व्या स्थानी आहे. दिल्लीत देखील डिसेंबरच्या तिमाहीत घरांच्या किमतीत घसरण झाली आहे. दिल्लीत घरांच्या किमतीत ३.९ टक्के घसरण झाली असून दिल्ली शहर १४६ व्या स्थानी आहे. कोलकाता शहरात घरांच्या किमतीत ४.३ टक्के घसरण झाली आहे. कोलकाता १४७ व्या स्थानी आहे.
तुर्कीमधील रिअल इस्टेटच्या किंमतीत मोठी घट
‘नाईट फ्रॅंक ग्लोबल रेसिडेन्शिअल सिटीज इंडेक्स’मध्ये आढावा घेण्यात आलेल्या जगातील प्रमुख १५० शहरामंध्ये तुर्कीमधील अंकारा शहरात घरांच्या किमतीत तब्बल ३० टक्के घसरण झाली आहे.त्याखालोखाल इजमीर शहरात २९ टक्के आणि इस्तान्बुल शहरात २७.९ टक्के घराच्या किंमती कमी झाल्याचे अहवालात म्हटलं आहे.
Source: https://maharashtratimes.com/business/real-estate-news/mumbai-housing-prices-down-in-december-quarter/articleshow/81837030.cms
