Mumbai Lockdown Update: मुंबईत लॉकडाऊन लागणार नाही; लोकलबाबतही पालिकेची स्पष्ट भूमिका – Maharashtra Times

मुंबई: मुंबईत करोना रुग्णसंख्येचा पुन्हा स्फोट झाला असताना व मंगळवारीच महापालिकेने होळी व धूलिवंदन साजरे करण्यास मनाई करणारा आदेश काढला असताना मुंबईत कोविड नियम आणखी कठोर केले जाण्याची शक्यता आहे. त्यासोबत पुन्हा लॉकडाऊन लावले जाऊ शकते अशीही चर्चा होत आहे. या पार्श्वभूमीवर आज माध्यमांनी अतिरिक्त पालिका आयुक्त सुरेश काकाणी यांच्याकडे विचारणा केली असता त्यांनी लॉकडाऊन व अन्य बाबतीत पालिकेची भूमिका स्पष्ट केली. ( Mumbai Lockdown Update Latest News )

वाचा: करोनाने चिंता वाढवली, महाराष्ट्रात करोनाचे दोन नवीन प्रकार आढळले

मुंबईत लॉकडाऊन होणार नाही, असे सुरेश काकाणी यांनी आज अगदी स्पष्ट शब्दांत सांगितले. राज्य शासनाने कोविड बाबत जी नवीन नियमावली जारी केलेली आहे. त्याची काटेकोरपणे अंमलबजावणी करण्यावर आमचा भर आहे. या नियमावलीत खासगी व सरकारी कार्यालयांसाठी ५० टक्के कर्मचारी उपस्थिती ठेवण्यास सांगण्यात आलेले आहे. त्याचे तंतोतंत पालन केल्यास गर्दी कमी होईल, असा विश्वास काकाणी यांनी व्यक्त केला. जुहू चौपाटी व मुंबईतील अन्य चौपाट्या तसेच विविध पर्यटनस्थळांवर गर्दी होऊ नये म्हणून उपाययोजना करण्यात येत आहेत. शिवाय पर्यटकांनी नियमांचे पालन करावे, अशीही सूचना देण्यात येत आहे, असे काकाणी यांनी नमूद केले.

वाचा: करोनाचा प्रादुर्भाव रोखण्यासाठी केंद्राच्या नव्या मार्गदर्शक सूचना, १ एप्रिलपासून लागू

गर्दी नियंत्रणात येत नसल्याने मुंबईत रुग्णसंख्या वाढत असल्याचे स्पष्ट झाले आहे. त्यात लोकलमधील गर्दी हेसुद्धा एक कारण आहे. त्याबाबत विचारले असता लोकलवर कोणतेही निर्बंध आणण्याचा विचार नसल्याचे काकाणी यांनी स्पष्ट केले. मुंबईत रॅपिड अँटीजेन टेस्ट वाढविण्यावर भर दिला जात आहे. पुढील कालावधीत दिवसाला ५० हजारपेक्षा जास्त तपासण्या करण्याची तयारी केली जात आहे. मंगळवारी एका दिवसात मुंबईत ४७ हजार चाचण्या घेण्यात आल्या, असेही काकाणी यांनी यावेळी सांगितले.

वाचा: भाजप आमदाराला शेतकऱ्यांनी ग्रामपंचायतीत कोंडले; कारण…