मुंबईच्या कुलाबा परिसरात ही घटना घडली. तेथे सीएचे कुटुंब राहते. त्याच्या मुलीची सोशल नेटवर्किंग साइटवर १९ वर्षीय शैजान अगवान नावाच्या मुलाशी मैत्री झाली. तो माझगावमध्ये राहतो. काही दिवसांत त्याच्या भूलथापांना बळी पडून मुलीने तिच्या घराची बनावट चावी त्याला दिली.
मुलीचे कुटुंब काही दिवसांपूर्वीच फिरण्यासाठी बाहेरगावी गेले होते. ते २७ जानेवारीला घरी परतले. मात्र, घरी आल्यानंतर घरातील दृश्य बघून त्यांना धक्काच बसला. घरातील कपाटातून सोन्याचे दागिने, रोकड आणि आयफोन गायब होता. सोन्याच्या दागिन्यांची किंमत जवळपास १४ लाख रुपये होती. या घटनेची माहिती त्यांनी पोलिसांना दिली. घरात कुणी घुसले नसून, घरातल्याच कुणीतरी चोरी केल्याचे प्रथमदर्शनी दिसून आले. पोलिसांनी शेजारी, सुरक्षारक्षक आणि अन्य लोकांकडे चौकशी केली. मात्र, कोणताही पुरावा हाती लागला नाही. पोलिसांनी तक्रारदाराच्या मुलीला विचारणा केली. त्यावेळी घराची बनावट चावी मित्राला दिली होती अशी माहिती तिने दिली. पोलिसांनी तिचा मित्र शैजानला अटक केली. त्याच्याकडील १ लाख रुपये आणि आयफोन जप्त केला आहे.
Source: https://maharashtratimes.com/crime-news/mumbai-crime-social-friend-breaks-into-colaba-home-steals-cash-and-gold/articleshow/80632302.cms
