Mumbai Local Train: घटस्थापनेच्या मुहूर्तावर महिलांसाठी उघडले लोकलचे दार; फक्त ‘ही’ आहे अट – Maharashtra Times

मुंबई: राज्यात मिशन बिगिन अगेन अंतर्गत अनेक निर्बंध शिथील करण्यात येत आहेत. त्यात मुंबई मेट्रो आणि मोनो रेल सेवेला हिरवा कंदील दाखवण्यात आल्यानंतर मुंबई उपनगरीय लोकल पूर्ववत व्हावी, या दिशेने सरकारने आणखी एक मोठे पाऊल टाकले आहे. सध्या धावत असलेल्या विशेष लोकलमधून आता सर्व महिला प्रवासी प्रवास करू शकणार आहेत. उद्या घटस्थापना असून याच मुहूर्तावर महिलांसाठी लोकलचे दार उघडण्यास राज्य सरकारने परवानगी दिली आहे. ( Mumbai Local Train Latest Updates )

वाचा: Unlock 5: मुंबई मेट्रोला हिरवा कंदील; ठाकरे सरकारने घेतले ‘हे’ महत्त्वाचे निर्णय

राज्याचे आपत्ती व्यवस्थापन, मदत आणि पुनर्वसन सचिव किशोर राजे निंबाळकर यांनी मध्य आणि पश्चिम रेल्वेला एक पत्र लिहून महिलांना लोकल प्रवासाची परवानगी देण्याची विनंती केली आहे. ही विनंती करताना प्रवासासाठी वेळेचे बंधन मात्र घालण्यात आले आहे. ‘१७ ऑक्टोबरपासून सर्व महिला प्रवाशांना लोकलने प्रवास करण्याची परवानगी द्यावी. सकाळी ११ ते दुपारी ३ वाजेपर्यंत आणि संध्याकाळी सात वाजेपासून पुढे शेवटच्या लोकलपर्यंत महिला प्रवासी प्रवास करू शकतात’, असे पत्रात स्पष्टपणे नमूद करण्यात आले आहे. वैध तिकिटासह महिला प्रवासी प्रवास करू शकणार आहेत. त्यात अत्यावश्यक सेवेतील महिला कर्मचाऱ्यांचाही अंतर्भाव असेल. या वेळेत प्रवास करण्यासाठी क्यूआर कोडची आता आवश्यकता असणार नाही, असेही पुढे नमूद करण्यात आले आहे. मुंबई आणि मुंबई महानगर प्रदेशात ही परवानगी देण्यात यावी, असेही स्पष्ट करण्यात आले आहे.

वाचा: खासगी कंपन्यांतील कर्मचाऱ्यांनाही मिळणार लोकल प्रवासाची मुभा

सध्या अत्यावश्यक सेवेतील कर्मचाऱ्यांसाठीच लोकल चालवल्या जात आहेत. त्यात कोणताही बदल करण्यात येऊ नये, असे नमूद करताना मागणीनुसार लोकलची संख्या वाढवण्यात यावी, असेही पत्रात म्हटले आहे.

दरम्यान, राज्य सरकारच्या या पत्रावर मध्य रेल्वेकडून सकारात्मक प्रतिक्रिया आली आहे. सरकारच्या विनंतीनुसार आम्ही पावले टाकत आहोत. संबंधित विभागांची मंजुरी मिळताच याबाबत अंमलबजावणी करण्यात येईल, असे मध्य रेल्वेने स्पष्ट केले.

लोकल पूर्ववत होण्याची प्रतीक्षा

लोकलबाबत राज्य सरकार सातत्याने अनेक निर्णय घेत आहे. लोकलच्या फेऱ्या वाढवण्याची परवानगी देताना विविध सेवांतील कर्मचाऱ्यांना लोकल प्रवासाची मुभा दिली गेली आहे. त्यात आता सर्व महिला प्रवाशांना लोकलचे दार उघडण्यास सांगून सरकारने मोठे पाऊल टाकले आहे. त्यामुळे आता सर्वच प्रवाशांसाठी लोकलचे दार कधी उघडणार व लोकलसेवा पूर्ववत कधी होणार, याबाबत उत्सुकता ताणली गेली आहे.

वाचा: क्वारंटाइनबाबत सरकारचा मोठा निर्णय; ‘या’ प्रवाशांना मिळणार दिलासा