मुंबई : राज्यातील सत्तांतरानंतर पंतप्रधान नरेंद्र मोदी आज, गुरुवारी प्रथमच मुंबईत येत असून, मुंबई महानगर प्रदेश विकास प्राधिकरण (एमएमआरडीए) आणि मुंबई महापालिकेच्या विविध प्रकल्पांचे लोकार्पण; तसेच भूमिपूजन त्यांच्या हस्ते होणार आहे. मुंबई तसेच ‘एमएमआरडीए’मधील महापालिकांच्या आगामी निवडणुका पाहता मोदी यांचा हा दौरा त्या निवडणुकांसाठीचे भूमिपूजनच असल्याचे मानले जात आहे.
शिवसेनेचा उद्धव ठाकरे गट व एकनाथ शिंदे गट, तसेच भारतीय जनता पक्ष यांच्या दृष्टीने मुंबई महापालिकेची निवडणूक अतिशय महत्त्वाची आहे. पालिकेच्या आगामी निवडणुका लक्षात घेऊनच मोदी यांच्या दौऱ्याचे नियोजन करण्यात आले आहे. मोदी यांचा हा दौरा आणि वांद्रे-कुर्ला संकुलातील जाहीर सभा या निमित्ताने भाजप आणि बाळासाहेबांची शिवसेना यांच्याकडून मुंबईत जोरदार वातावरण निर्मिती करण्यात आली आहे. भाजपच्या गोटात गेले तीन दिवस सलग बैठका सुरू आहेत. मोदींचा मुंबई दौरा लक्षात घेऊन उपमुख्यमंत्री देवेंद्र फडणवीस यांनी दावोसला जाण्याचे टाळले होते. भाजपच्या नियोजनानुसार मोदी यांचे विमानतळावर जोरदार स्वागत करण्यात येणार आहे. मुख्यमंत्री शिंदे यांच्या पक्षानेही मोदी यांचा मुंबई दौरा यशस्वी करण्यासाठी कंबर कसली असून, सभेसाठी गर्दी जमविण्याचे नियोजन मुंबई आणि ठाण्यातील कार्यकर्त्यांकडे सोपविले आहे.
३८ हजार ८०० कोटींचे प्रकल्प
मोदी यांची सायंकाळी पाच वाजता वांद्रे कुर्ला संकुल येथील एमएमआरडीए मैदानावर सभा होईल. या दौऱ्यात मोदी यांच्या हस्ते मुंबईतील सुमारे ३८ हजार ८०० कोटी रुपयांच्या विविध महत्त्वाकांक्षी प्रकल्पांचे लोकार्पण, भूमिपूजन होणार असून, पंतप्रधान स्वनिधी योजनेच्या एक लाखापेक्षा जास्त लाभार्थींना मंजूर झालेल्या कर्जांच्या हस्तांतरणाचा प्रारंभही होणार आहे. एमएमआरडीए मैदानावरच हा कार्यक्रम होणार असून, मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्यासह मान्यवरांची उपस्थिती असेल.
Source: https://news.google.com/__i/rss/rd/articles/CBMilQFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL25hcmVuZHJhLW1vZGktd2lsbC1pbmF1Z3VyYXRlLXByb2plY3RzLW9mLW1tcmRhLWFuZC1ibWMtaW4tbXVtYmFpLXRvZGF5L2FydGljbGVzaG93Lzk3MTEwODk3LmNtc9IBmQFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL25hcmVuZHJhLW1vZGktd2lsbC1pbmF1Z3VyYXRlLXByb2plY3RzLW9mLW1tcmRhLWFuZC1ibWMtaW4tbXVtYmFpLXRvZGF5L2FtcF9hcnRpY2xlc2hvdy85NzExMDg5Ny5jbXM?oc=5