म. टा. विशेष प्रतिनिधी, मुंबई ः करोना रुग्णसंख्येमध्ये किंचित वाढ दिसत असली, तरीही करोना संसर्गाची चौथी लाट ही गंभीर स्वरूपाची नसल्याची शक्यता वैद्यकीय तज्ज्ञांकडून वर्तवली जात आहे. त्यामुळे पालिकेने दहिसर, नेस्को आणि कांजुरमार्ग येथील करोना उपचार केंद्रे बंद करण्याचा निर्णय घेतला आहे. इतर नऊ केंद्रांची उपलब्धता गरजेनुसार राहणार आहे.
या केंद्रामधील ऑक्सिजनच्या खाटा, औषधांची उपलब्धता तसेच इतर वैद्यकीय सामग्री पालिकेच्या मुख्य रुग्णालयांसह उपनगरी रुग्णालयांमध्ये गरजेनुसार पाठवण्यात येणार असल्याचे पालिकेतील वरिष्ठ प्रशासकीय अधिकाऱ्यांनी सांगितले. ज्या ठिकाणी करोना वैद्यकीय उपचार केंद्रे ही पर्यायी व्यवस्थेसाठी ठेवण्यात आली आहेत, तिथे रुग्णसंख्या वाढल्यास तत्काळ वैद्यकीय सेवा सुरू करण्याचे निर्देश देण्यात आले आहेत. जी केंद्रे टप्प्याटप्याने बंद करण्यात येतील त्या केंद्रांमधील औषधे, वैद्यकीय सामग्री, पीएसए तसेच द्रवस्वरूपातील ऑक्सिजन साठवणूक करणारे टँक याची उपलब्धता इतरत्र गरजेनुसार देण्यात येणार आहे. या चारही करोना उपचार केंद्रांमध्ये आठ हजारपेक्षा अधिक खाटांची उपलब्धता आहे. त्यापैकी सर्वाधिक म्हणजे ३,७०० खाटा या नेस्कोमध्ये आहेत.
मुंबईबाहेरून विचारणा
पालिकेने या केंद्रांमध्ये असलेल्या औषधांचा, तसेच इतर वैद्यकीय सामग्रीची उपलब्धता ही उपनगरी रुग्णालयांसह गरजेनुसार इतर रुग्णालयांमध्ये देण्याचा निर्णय घेतला आहे. मात्र, मुंबईबाहेरील पालिकांकडूनही यासाठी विचारणा होत आहे. वसई-विरार, भिवंडी तसेच ठाण्यातूनही या ऑक्सिजन खाटांची, तसेच व्हेन्टिलेटरच्या उपलब्धतेसंदर्भात चौकशी केली जात आहे. मात्र, पालिका प्रशासनाने मुंबईतील रुग्णालयांना यासंदर्भात प्राधान्य देण्याचे ठरवले आहे. विविध संस्था, तसेच केंद्र सरकारकडून मदत म्हणून देण्यात आलेल्या व्हेन्टिलेटर्सच्या संदर्भातही निर्णय घेताना मुंबईला प्राधान्य देण्यात येणार आहे. पालिका रुग्णालयामध्ये यासंदर्भात माहिती देण्यात आली असून, रुग्णालयांना कोणत्या औषधांची गरज आहे, यासंदर्भात माहिती विचारण्यात आली आहे. या औषधांखेरीज जम्बो करोना सुविधांमध्ये आयसीयु, बायपॅप मशिन्स, मॉनिटर्सच्या उपलब्धताही आहे. या केंद्रांमधील २५हून अधिक पीएसए, तसेच आठ एलएमओ सुविधांची उपलब्धताही रुग्णालयांना दिली जाणार आहे.
अंतर्गत क्षमतेवर परिणाम नाही. या केंद्रामधील ऑक्सिजन, तसेच खाटांची उपलब्धता इतरत्र फिरवली तरीही रुग्णालयांना या बाबींचा तुटवडा होणार नाही, असेही वरिष्ठ वैद्यकीय तज्ज्ञांनी सांगितले.
Source: https://maharashtratimes.com/maharashtra/mumbai-news/bmc-to-close-covid-centre-at-dahisar-nesco-and-kanjurmarg/articleshow/91455152.cms
