मुंबईत आढळलेल्या तरुणीच्या मृतदेहाचे गूढ उकलले; धक्कादायक माहिती उघड – Maharashtra Times

मुंबई : वर्सोवा येथील समुद्रकिनारी गुरुवारी गोणीमध्ये एका तरुणीचा मृतदेह (Mumbai Girl Found Dead) आढळला होता. या मृतदेहाचे गूढ उकलण्यात पोलिसांना यश आले आहे. सोनम शुक्ला (१९) असे या मृत तरुणीचे नाव असून तिची हत्या केल्याप्रकरणी पोलिसांनी मोहम्मद शहाजेब अन्सारी (२३) याला अटक केली. प्रेमप्रकरणातील वादातून त्याने हे कृत्य केल्याचे समोर आले आहे.

वर्सोवा समुद्रकिनारी गुरुवारी सायंकाळी साडेपाचच्या सुमारास गोणी आढळून आली. वर्सोवा पोलिसांनी घटनास्थळी जाऊन या गोणीची तपासणी केली असता आत एका तरुणीचा मृतदेह आढळला. वायरने गळा आवळून तरुणीची हत्या करण्यात आली होती. मृतदेह कुजला असल्याने त्याची ओळख पटविणे कठीण होते. वर्सोवा पोलिसांनी बेपत्ता व्यक्तींच्या नोंदी तपासल्या. त्यावेळी गोरेगाव पोलिस ठाण्यात २६ एप्रिल रोजी सोनम शुक्ला ही तरुणी बेपत्ता झाल्याची नोंद होती. वर्सोवा पोलिसांनी सोनम राहत असलेल्या परिसरात तपास केंद्रीत केला.

उष्णतेबाबत केंद्र सरकारने प्रशासनासह नागरिकांना दिल्या महत्वपूर्ण सूचना

तपासादरम्यान याच परिसरातील शहाजेब अन्सारी याचे सोनमसोबत प्रेमसंबंध असल्याची माहिती पोलिसांना मिळाली. तांत्रिक पुराव्यांच्या आधारे पोलिसांनी शहाजेबला ताब्यात घेतले. प्रेमप्रकरणातून झालेल्या वादातून सोनमची हत्या केल्याची कबुली शहाजेब याने दिली.