ठाणे ते थेट दक्षिण मुंबई?; मुंबईकरांची वाहतूक कोंडीतून सुटका होण्यासाठी MMRDAचे महत्त्वाचे पाऊल – Maharashtra Times

पूर्व मुक्त मार्ग कर्नाक बंदर, प्रिन्सेस स्ट्रीटपर्यंत वाढवण्याचा विचार

पालिका- एमएमआरडीए प्राथमिक चर्चा

म. टा. प्रतिनिधी मुंबई: पी डिमेलो रस्त्यावर सुरू होणाऱ्या पूर्व द्रुतगती मार्गाचा विस्तार दक्षिण मुंबईत कर्नाक बंदरपर्यंत करण्याचा विचार मुंबई महानगर प्रदेश विकास प्राधिकरणामार्फत (एमएमआरडीए) सुरू आहे. तेथून हा मार्ग मरीन ड्राइव्हकडे प्रिन्सेस स्ट्रीटपर्यंत नेता येऊ शकतो का, याचा विचार केला जाणार आहे. त्यामुळे ठाण्यातून निघालेल्या नागरीकांना उन्नत मार्गिकेवरून थेट दक्षिण मुंबईत पोहचता येणार आहे. त्याबाबत मुंबई पालिका आणि एमएमएमआरडीएच्या वरिष्ठ अधिकाऱ्यांची नुकतीच एक बैठक पार पडली.

दक्षिण मुंबईला पूर्व उपनगरांशी थेट जोडण्यासाठी पूर्व मुक्तमार्ग महत्त्वाचा आहे. हा रस्ता १६.८ किलोमीटर लांब असून दक्षिण मुंबईत पी डिमेलो रस्त्यावर सुरू होऊन पूर्व द्रुतगती मार्गावर छेडानगर जंक्शनजवळ त्याचा शेवट होतो. आता या मार्गाचा ठाण्यातील आनंदनगरपर्यंत विस्तार करण्यासाठी नुकत्याच निविदा मागविल्या आहेत. छेडानगर जंक्शन ते आनंदनगर असा ११.९ किलोमीटर लांबीचा हा मार्ग असणार आहे. यासाठी सुमारे ३,१४८ कोटी रुपयांचा खर्च अपेक्षित आहे. या प्रकल्पाला गती देण्यासाठी नुकत्याच सादर झालेल्या एमएमआरडीएच्या अर्थसंकल्पात १५० कोटी रुपयांची तरतूद केली आहे. आता दक्षिण मुंबईकडेही या मार्गाचा विस्तार करण्याचा एमएमआरडीएचा विचार सुरू आहे. दक्षिण मुंबईत पी डिमेलो रस्त्यावर कर्नाक बंदरपर्यंत विस्तार करण्याचे विचाराधीन आहे. हे अंतर सुमारे १ किलोमीटर असेल. तसेच तेथून पश्चिमेकडे प्रिन्सेस स्ट्रीटपर्यंत मरीन ड्राइव्हच्या दिशेला हा रस्ता नेला जाऊ शकतो का, याचाही विचार एमएमआरडीएकडून सुरू आहे.

या उन्नत मार्गिकेमुळे दक्षिण मुंबईत कॉफर्ड मार्केट, सीएसएमटी स्थानकाजवळ होणारी वाहतूककोंडी कमी करण्याचा प्रयत्न आहे, असे अधिकाऱ्यांनी सांगितले. त्यामुळे हा मार्ग साकारल्यास कर्नाक बंदरपासून ठाण्यातली आनंदनगरपर्यंत या विनाअडथळा सुमारे ३० किलोमीटर अंतर प्रवास करता येणार आहे. त्यातून ठाण्यातून दक्षिण मुंबईत येणाऱ्या प्रवाशांचा प्रवास अधिक जलद होणार आहे.

दक्षिण मुंबईतील वाहतूककोंडी कमी करण्यासाठी पूर्व मुक्त मार्गाचा कर्नाक बंदर आणि तेथून पुढे प्रिन्सेस स्ट्रीटकडे विस्तार करण्याचा विचार सुरू आहे. त्याची प्राथमिक चर्चा झाली. सुमारे १ किलोमीटर अंतरापर्यंत त्याचा विस्तार करता येईल का याचा विचार सुरू आहे,

-एस. व्ही. आर. श्रीनिवास,

एमएमआरडीएचे महानगर आयुक्त