मुंबई: मुंबईतील उच्चभ्रू परिसर म्हणून ओळखल्या जाणाऱ्या वरळी सीफेस येथे सोमवारी एक धक्कादायक प्रकार समोर आला. सी फेसच्या परिसरात दोन वेगवेगळ्या ठिकाणी दोन तरुणांचे मृतदेह आढळून आल्याने मोठी खळबळ उडाली आहे.
प्राथमिक माहितीनुसार, रविवारी सकाळी साडेआठच्या सुमारास एका व्यक्तीचा मृतदेह आढळून आला. ही व्यक्ती ३० ते ४० वर्षांची असावी. पोलिसांनी घटनास्थळी येत मृतदेह ताब्यात घेतला. त्यानंतर पोलिसांकडून या मृतदेहाची ओळख पटवण्याचे काम सुरु आहे. शवविच्छेदन अहवाल समोर आल्यानंतर या प्रकरणाचा तपास पुढे सरकू शकतो. तर दुसरीकडे कोस्टल रोडचे काम सुरू असलेल्या ठिकाणी एका कामगाराने झाडाला गळफास घेऊन आत्महत्या केल्याचे निदर्शनास आले. मात्र, त्याच्या आत्महत्येचे नेमके कारण अद्याप समजू शकलेले नाही. या प्रकरणी वरळी पोलीस ठाण्यात अपघाती मृत्यूची नोंद करण्यात आली असून पोलीस अधिक तपास करत आहेत.
Source: https://maharashtratimes.com/maharashtra/mumbai-news/two-dead-bodies-found-near-worli-sea-face-mumbai/articleshow/90199511.cms
