हायलाइट्स:
- मुंबईत करोना लाट असतानाच गेल्या २४ तासांत चित्र बदलले
- मुंबईत गेल्या २४ तासांत १३ हजारांहून अधिक नवीन रुग्णांची नोंद
- बुधवारच्या तुलनेत रुग्णसंख्या घटली
- ८४ टक्के रुग्णांमध्ये करोनाची कोणतीही लक्षणे नाहीत
मुंबई: मुंबईत नवीन वर्षाच्या सुरुवातीला करोना रुग्णांच्या संख्येत प्रचंड वाढ नोंदवली गेली होती. त्यामुळे करोना (coronavirus) लाटेचा वेग वाढल्याचे चित्र होते. बुधवारीही १६ हजारांहून अधिक रुग्णांची नोंद झाली होती. मात्र, हीच करोना लाट आता ओसरली की काय, असे चित्र सध्या तरी दिसते. गेल्या २४ तासांत मुंबईत १३७०२ नवीन रुग्णांची नोंद झाली आहे. बुधवारच्या तुलनेत नवीन बाधित रुग्णांमध्ये घट झाली आहे. तर याच कालावधीत बरे होणाऱ्या रुग्णांची संख्या नवीन बाधितांपेक्षा तुलनेने अधिक आहे. या आकडेवारीचा विचार केला तर, एकंदरीत मुंबईसाठी दिलासादायक बाब आहे.
मुंबई महापालिकेने गेल्या २४ तासांतील करोना रुग्णांची आकडेवारी प्रसिद्ध केली आहे. त्यानुसार, गेल्या २४ तासांत मुंबईत १३, ७०२ नवीन करोनाबाधित रुग्ण आढळले आहेत. तर नवीन बाधितांपेक्षा बरे झालेले रुग्ण अधिक आहेत. याच कालावधीत २०,८४९ रुग्ण बरे होऊन त्यांना रुग्णालयातून सोडण्यात आले आहे. शहरातील बरे झालेल्या रुग्णांची संख्या आता ८५५८११ वर पोहोचली असून, रिकव्हरी रेट ८८ टक्क्यांवर पोहोचला आहे.
Corona Update in Maharashtra : करोनानं धास्ती वाढवली; राज्यभरात रुग्णांच्या संख्येत पुन्हा मोठी वाढ, ‘ही’ आहे ताजी स्थिती
मुंबईत एकूण सक्रिय रुग्ण ९५१२३ इतके आहेत. तर, दुपटीचा दर हा ३६ दिवसांवर आला आहे. कोविड वाढीचा दर हा ६ ते १२ जानेवारी या कालावधीत १.८५ टक्के इतका झाला आहे. गेल्या २४ तासांत मुंबईत ६ जणांचा करोनामुळे मृत्यू झाल्याची नोंद आहे. दरम्यान, करोनाबाधित रुग्णांपैकी ८४ टक्के रुग्णांमध्ये कोणतीही लक्षणे आढळलेली नाहीत.
मुंबईत बुधवारी १६ हजारांहून अधिक रुग्ण
मुंबई महापालिकेच्या आरोग्य विभागाने बुधवारी आकडेवारी जाहीर केली होती. सोमवारी आणि मंगळवारी रुग्णसंख्या घटली होती. मात्र, बुधवारी रुग्णसंख्येत वाढ नोंदवली. मंगळवारच्या तुलनेत जवळपास पाच हजार रुग्ण वाढले होते. बुधवारी जाहीर केलेल्या आकडेवारीनुसार, २४ तासांत १६,४२० नवीन करोनाबाधित रुग्ण आढळले होते. दिलासादायक बाब म्हणजे ८४ टक्के रुग्णांमध्ये कोणतीही लक्षणे आढळली नव्हती.
मोठी बातमी: पंतप्रधान नरेंद्र मोदींच्या बैठकीला उद्धव ठाकरे गैरहजर राहणार?
Source: https://maharashtratimes.com/maharashtra/mumbai-news/coronavirus-in-mumbai-over-13000-covid-19-cases-reported-in-mumbai-today-see-latest-update/articleshow/88881674.cms
