हायलाइट्स:
- मुंबईत ओमिक्रॉनचे दोन रुग्ण आढळल्यानंतर राज्य शासनाने उचलली कठोर पावले.
- राज्य सरकारने जारी केली सुधारित कठोर नियमावली.
- जगातील ११ देशांना घोषित केले ‘हाय रिस्क’ देश.
मुंबई: मुंबईत ओमिक्रॉनची लागण झालेले दोन रुग्ण आढळल्याने मुंबईकरांची चिंता आता वाढली आहे. या दोन रुग्णांबरोबरच राज्यातील एकूण ओमिक्रॉन रुग्णांची संख्या आता दहावर पोहोचली आहे. मुंबईत दोन रुग्ण आढळल्याने आता राज्य सरकारने आंतरराष्ट्रीय प्रवाशांसाठी अधिक कडक अशी नवी नियमावली जारी केली आहे. वाढत्या ओमिक्रॉनला अटकाव करण्यासाठी आता राज्य सरकारने एकूण ११ देशांना अति जोखमीचे देश (हाय रिस्क) म्हणून घोषित केले आहे. तसेचे या देशांमधून येणाऱ्या प्रवाशांसाठी कठोर नियमावलीही जारी केली आहे. (in mumbai two people have been infected with omicron variant the state government has issued revised and strict regulations for international passengers)
ओमिक्रॉनचा धोका लक्षात घेता यापू्र्वी राज्य सरकारने ३० नोव्हेंबर या दिवशी नियमावली जारी केली होती. या नियमावलीत आता शासनाने सुधारणा केली आहे. राज्य शासनाच्या ३० नोव्हेंबरच्या नियमावलीत एकूण २ हाय रिस्क देशांचा समावेश होता आणि ती संख्या वाढून हाय रिस्क देशांची संख्या ११ वर पोहोचली आहे.
अशी आहे नियमावली
> सर्व आंतरराष्ट्रीय प्रवाशांना आरटीपीसीआर टेस्ट बंधनकारक.
> चाचणीमध्ये ओमायक्रॉनची बाधा झाल्याचे आढळल्यास सक्तीचे क्वारंटनाईन.
> शासनाच्या नियमांनुसार उपचार घ्यावे लागणार.
> तसेच,रुग्णाचा रिपोर्ट निगेटिव्ह येईपर्यंत घ्यावे लागणार उपचार.
> प्रवाशाची चाचणी निगेटिव्ह आल्यास सात दिवसांचं होम विलगीकरण.
> त्यानंतर आठव्या दिवशी पुन्हा चाचणी करण्यात येईल.
अति जोखमीचे देश (हाय रिस्क)
१. युरोप आणि ब्रिटन
२. दक्षिण आफ्रिका
३. ब्राझिल
४. बोत्सवाना
५. मॉरिशिअस
६. न्यूझीलंड
७. सिंगापूर
८. हाँगकाँग
९. झिम्बॉबे
१०. इस्राइल
११. चीन
Source: https://maharashtratimes.com/maharashtra/mumbai-news/in-mumbai-two-people-have-been-infected-with-omicron-variant-the-state-government-has-issued-revised-and-strict-regulations-for-international-passengers/articleshow/88129235.cms
