मुंबई: जुहूमधील इमारतीच्या बांधकामात बदल केल्याप्रकरणी मुंबई महापालिकेनं कारवाईचा पवित्रा घेतल्यामुळं अडचणीत आलेला अभिनेता सोनू सूद याला मुंबई उच्च न्यायालयानं दिलासा दिला आहे. दिवाणी न्यायालयानं कारवाईपासून दिलेलं अंतरिम संरक्षण १३ जानेवारीपर्यंत कायम ठेवण्याचे आदेश न्या. पृथ्वीराज चव्हाण यांनी दिले आहेत.
वाचा: भयानक! ‘गुगल मॅप’च्या भरवशावर कार गेली धरणात, एकाचा मृत्यू
जुहूमधील ए बी नायर मार्गावर ‘शक्तीसागर’ नावाची सहा मजली निवासी इमारत आहे. ही इमारत सोनू सूदच्या मालकीची आहे. मात्र, सोनूनं या इमारतीत बदल करून तिचं हॉटेलमध्ये रूपांतर केलं होतं. त्यासाठी महापालिकेची आवश्यक परवानगी घेतली नाही, असे तपासणीत आढळल्यानंतर पालिकेने गेल्या वर्षी ऑक्टोबरमध्ये सोनूला एमआरटीपी कायद्यांतर्गत नोटीस बजावली होती. त्याविरोधात सोनूने दिवाणी न्यायालयात दावा दाखल करून कठोर कारवाई होऊ नये म्हणून तातडीचा अर्जही केला होता. दिवाणी न्यायालयाने तो अर्ज फेटाळत त्याविरोधात अपील करण्यासाठी त्याला तीन आठवड्यांची मुदत दिली होती. त्याचा अर्ज फेटाळला जाताच पालिकेने जुहू पोलिसांत चार जानेवारीला लेखी तक्रार दिली. मात्र, अद्याप गुन्हा दाखल झालेला नाही.
वाचा: अरेरे! शेवटचे मंगलाष्टक सुरू असतानाच नवरदेव कोसळला!
महापालिकेनं पोलिसांत तक्रार केल्यानंतर सोनू सूदनं तात्काळ मुंबई उच्च न्यायालयात धाव घेतली होती. महापालिकेची नोटीस रद्द करावी किंवा तूर्तास त्यावरील कठोर कारवाईला मनाई करावी, अशा विनंती त्याने केली होती. त्यावर आज सुनावणी झाली. त्यावेळी न्यायालयानं सोनू सूदला तात्पुरता दिलासा दिला.
वाचा: महाराष्ट्रात ‘बर्ड फ्लू’चा फेरा, परभणीत ८०० कोंबड्यांचा मृत्यू
Source: https://maharashtratimes.com/maharashtra/mumbai-news/bombay-high-court-gives-interim-relief-to-actor-sonu-sood-against-bmc-notice/articleshow/80211777.cms
