Mumbai Rains: मुंबईत पावसाची रात्रपाळी; सायन स्टेशन जलमय, अनेक भागांत भरले पाणी – Maharashtra Times

मुंबई: मुंबईत मंगळवारी सायंकाळपासून सुरू झालेल्या मुसळधार पावसामुळे अनेक भागांत पाणी भरले आहे. मध्य रेल्वे मार्गावरील सायन स्टेशन येथे मोठ्या प्रमाणात पाणी साचले असून रेल्वेरूळ पूर्णपणे पाण्याखाली गेले आहेत. सायनजवळ लोकल खोळंबल्याने अनेक प्रवाशांची कोंडी झाली आहे. सध्या केवळ अत्यावश्यक सेवांमधील कर्मचाऱ्यांसाठी विशेष लोकल चालवल्या जात आहेत. त्यामुळे प्रवाशांची संख्या कमी असली तरी उपनगरांच्या दिशेने जाणारे प्रवासी सायन स्टेशनमध्ये अडकून पडले आहेत.

वाचा: मुंबईसह ‘या’ जिल्ह्यात अति मुसळधार पावसाचा अंदाज

मुंबई शहर व उपनगरांत मंगळवारी दिवसभर हलका पाऊस होता. सायंकाळनंतर पावसाचा जोर वाढला. सुमारे तीन तास सर्वत्र मुसळधार पाऊस झाला. त्यामुळे अनेक सखल भागांत पाणी भरले आहे. गोरेगावमध्ये अनेक रस्ते जलमय झाले आहेत. रस्त्यांवर पाण्याचे मोठे लोट पाहायला मिळत आहेत. मालाड, अंधेरी, खार, दादर या भागांतही पाणी भरले असून बेस्टने अनेक मार्गांवरील वाहतूक अन्य मार्गांवर वळवली आहे. मुंबई पालिकेने याबाबत ट्विटरच्या माध्यमातून माहिती दिली आहे.

अशी वळवली वाहतूक…

– उड्डाणपुलमार्गे हिंदमाता व भोईवाडा मार्गे शिवडी
– भाऊ दाजी रोडमार्गे गांधी मार्केट
– सायन मेन रोडमार्गे सायन रोड २४
– मर्निया मस्जिद मार्गे मालाड सबवे (पूर्व व पश्चिम)
– लिंकिंग रोडमार्गे वांद्रे टॉकीज, जुना खार
– भगत सिंह नगरमार्गे शास्त्री नगर, गोरेगाव
– जेव्हीपीडी लिंकिंग रोडमार्गे अंधेरी मार्केट सबवे

मंगळवारी सकाळी ८ ते रात्री ११ वाजेपर्यंत मुंबईत खालीलप्रमाणे सरासरी पाऊस झाला:

शहर – ७३.५२ मिमी
पूर्व उपनगरे – २७.८७ मिमी
पश्चिम उपनगरे – ७८.६८ मिमी

वाचा: सविनय कायदेभंग: मनसे नेते संदीप देशपांडे यांच्यासह चौघांना अटक

आज काही भागांत मुसळधार

मुंबईत रात्रभर पावसाचा जोर कायम राहण्याची शक्यता हवामान विभागाने वर्तविली आहे. आज मुंबई शहर आणि उपनगर तसेच ठाणे व रायगड या जिल्ह्यांसाठी यलो अलर्ट देण्यात आला आहे. त्यानुसार या जिल्ह्यांतील काही भागांत जोरदार पावसाची शक्यता आहे. तर पालघर जिल्ह्यासाठी ऑरेंज अॅलर्ट जारी करण्यात आला आहे. त्यानुसार पालघरमधील काही भागांत अतिवृष्टी होण्याची शक्यता आहे. मंगळवारी दिवसभर कोसळणाऱ्या हलक्या सरी तसेच सायंकाळनंतर वाढलेला पावसाचा जोर यामुळे मुंबईतील हवेत प्रचंड गारवा निर्माण झाला आहे. मुंबईत आज तापमानाचा पारा २६ डीग्रीपर्यंत खाली येईल, असा हवामान विभागाचा अंदाज आहे.

वाचा: CM उद्धव ठाकरे यांच्या ‘या’ निर्णयाने जिंकली मने; चर्चा तर होणारच!