मुंबई : दादर नायगाव येथील प्रसिद्ध नायगाव एज्युकेशन सोसायटी या शैक्षणिक संस्थेमध्ये सात कोटी रुपयांपेक्षा अधिक निधीची अफरातफर करण्यात आल्याची धक्कादायक बाब समोर आली आहे. कोणतेही अधिकार नसताना पदाधिकारी असल्याचे भासवून, संस्थेच्या कागदपत्रांचा गैरवापर करून माजी पदाधिकाऱ्यांनी पैशांचा अपहार केला आहे. याप्रकरणी १६ जणांवर गुन्हा दाखल करण्यात आला. यामध्ये संस्थेतर्फे चालविल्या जाणाऱ्या महाविद्यालय, शाळा, बालवाडीचे मुख्याध्यापक आणि इतर अधिकाऱ्यांचा समावेश आहे.
नायगाव एज्युकेशन सोसायटी ही नावाजलेली शैक्षणिक संस्था असून १९६३मध्ये या संस्थेची स्थापना करण्यात आली. धर्मादाय आयुक्तांकडे नोंदणीकृत असलेल्या या शैक्षणिक संस्थेच्या वतीने क्रांतिसिंह नाना पाटील विद्यालय, दौंड तालुका कला व वाणिज्य महाविद्यालय, इंग्लिश मीडियम प्री प्रायमरी स्कूल, इंग्लिश मीडियम प्रायमरी स्कूल, नायगाव एज्युकेशन सोसायटीचे प्राथमिक विद्यालय, शिशु विकास मंदिर (बालवाडी) या संस्था चालविल्या जातात. सन २००३मध्ये नियमानुसार संस्थेची निवडणूक घेणे बंधनकारक असतानाही संस्थेच्या तत्कालीन कार्यकारी मंडळाने ती घेतली नाही. सन २००३ ते २०११पर्यंत संस्थांचे पदाधिकारी नसतानाही काही पदाधिकाऱ्यांनी संस्थेत मोठा आर्थिक गैरव्यवहार केला, असा आरोप इतर सदस्य आणि पदाधिकाऱ्यांकडून केला जात होता. त्यामुळे संस्थेच्या वतीने निवडणूक घेऊन नवीन कार्यकारिणी निवडण्यात आली. याचदरम्यानच्या कालावधीमधील आर्थिक लेखाजोखा सादर केला नसल्याचे धर्मादाय आयुक्त कार्यालयाकडून कळविण्यात आले.
– नायगाव एज्युकेशन सोसायटीच्या नवनियुक्त पदाधिकाऱ्यांनी विशेष लेखा परीक्षण करण्यासाठी वेगवेगळ्या चार्टर्ड अकाउंटंटची नेमणूक केली.
– गैरव्यवहार केल्याचे आढळत असल्याने अनेकांनी काम नाकारले.
– एका चार्टर्ड अकाउंटंटने अखेर संस्थेच्या कारभाराचे विशेष लेखा परीक्षण केले आणि धर्मादाय आयुक्त कार्यालयात सादर केले.
– या अहवालात माजी पदाधिकाऱ्यांनी आर्थिक व्यवहार करण्याचे कोणतेही अधिकार नसताना वेगवेगळ्या माध्यमांतून सुमारे सात कोटी रकमेचा अपहार केल्याचे दिसून आले.
सोळा जणांविरुद्ध गुन्हा
पैशांचा असा वैयक्तिक वापर म्हणजे गुन्हा असल्याने धर्मादाय आयुक्त कार्यालयाने याबाबत पोलिस ठाण्यात तक्रार देण्यास सांगितले. त्यानुसार संस्थेच्या पदाधिकाऱ्यांनी दिलेल्या तक्रारीवरून १६ जणांविरुद्ध भोईवाडा पोलिसांनी गुन्हा दाखल केला.
Source: https://news.google.com/__i/rss/rd/articles/CBMioQFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL21pc2FwcHJvcHJpYXRpb24tb2YtNy1jcm9yZXMtaW4tZWR1Y2F0aW9uYWwtaW5zdGl0dXRpb24tYnktcHJldGVuZGluZy10by1iZS1vZmZpY2VyL2FydGljbGVzaG93Lzk2ODIzNjU4LmNtc9IBpQFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL21pc2FwcHJvcHJpYXRpb24tb2YtNy1jcm9yZXMtaW4tZWR1Y2F0aW9uYWwtaW5zdGl0dXRpb24tYnktcHJldGVuZGluZy10by1iZS1vZmZpY2VyL2FtcF9hcnRpY2xlc2hvdy85NjgyMzY1OC5jbXM?oc=5
