म. टा. खास प्रतिनिधी, मुंबई ः आपले घर किंवा दुकान कुणाला भाड्याने दिल्यास त्याची माहिती पोलिसांना देणे बंधनकारक असूनही मुंबईकर त्याकडे काणाडोळा करीत असल्याचे निदर्शनास आले आहे. त्यामुळे पुन्हा एकदा आदेश जारी करीत मुंबई पोलिसांनी भाडेकरूंची माहिती देण्यास सांगितले आहे. दहशतवादी, समाजकंटकांकडून विशेषतः परदेशी नागरिकांकडून आश्रयस्थानाचा दुरुपयोग होण्याची भीती असल्याने ही सक्ती करण्यात आली आहे. भाडेकरूंची माहिती न दिल्याचे आढळल्यास कारवाई करण्याचा इशाराही पोलिसांनी दिला आहे.
मुंबईतील आपल्या मालकीचे घर, दुकान, व्यावसायिक गाळा कुणालाही भाडेतत्त्वावर देताना पोलिसांना त्यासंदर्भात माहिती देणे बंधनकारक आहे. मुंबई पोलिसांच्या वेबसाइटवर जाऊन आपल्या भाडेकरूंची आणि स्वतःची माहिती सहज भरता येऊ शकते. असे असूनही मुंबईकर टाळाटाळ करीत असल्याचे पोलिसांच्या निदर्शनास आले. याआधीच्या अनेक घटनांमध्ये आरोपी भाड्याने राहात असल्याचे तपासातून समोर आले. त्यामुळे भाडेकरूंची माहिती पोलिसांना न दिल्यास त्याचा गैरफायदा समाजकंटक, दहशतवादी घेण्याची दाट शक्यता आहे. आपल्या दुर्लक्षामुळे एखादी मोठी दुर्घटना होऊ नये याची सावधगिरी म्हणून सर्वांनी भाडेकरूंची माहिती त्वरित द्यावी, असे आदेश मुंबई पोलिसांनी जारी केले आहेत.
मुंबई पोलिसांच्या वेबसाइटवरील सिटिझन पोर्टलवर भाडेकरूची माहिती ऑनलाइन अपलोड करण्याची सुविधा आहे. ज्या व्यक्तीला घर, दुकान भाड्याने देण्यात आले आहे, त्याचा सविस्तर तपशील येथे भरायचा आहे. व्यक्ती परदेशी असल्यास त्याचे नाव, राष्ट्रीयत्व याचबरोबर पासपोर्ट क्रमांक, जारी केल्याचे ठिकाण, वैधता तसेच व्हिसा क्रमांक, श्रेणी आणि मुदत अशी माहिती भरावी, असे आदेशात नमूद करण्यात आले आहे. पोलिसांच्या या आदेशाचे उल्लंघन केल्यास सदर घरमालकावर भादंवि १८६०च्या कलम १८८ अंतर्गत कारवाई केली जाईल, असे पोलिसांनी म्हटले आहे.
तिकडे ट्विटरचा मालक बदलला, इकडे मुंबई रेल्वे पोलिसांचं अकाऊंट हॅक, आयुक्तांची मोठी
गैरसोय टाळण्यासाठी…
यापूर्वी भाडेकरूची माहिती पोलिस ठाण्यात जाऊन देण्याची सक्ती होती. मात्र पोलिसांबाबतची भीती, पोलिसांकडून मिळणारी वागणूक यामुळे नागरिक पोलिस ठाण्यात जाणे टाळतात. काही वर्षांपूर्वी भाडेकरूची माहिती पोस्टाने देण्याची व्यवस्था करण्यात आली होती. त्यावेळी देखील म्हणावा तसा प्रतिसाद न आल्याने नागरिकांची गैरसोय टाळण्यासाठी मुंबई पोलिसांच्या वेबसाइटवरील सिटिझन पोर्टलवर माहिती देण्याची सुविधा ऑनलाइन उपलब्ध करून देण्यात आली आहे.
वेग १२ किमी प्रति तास, मग सीटबेल्ट कशाला?; टॅक्सीचालक युनियनचा नव्या नियमांना विरोध
Source: https://news.google.com/__i/rss/rd/articles/CBMikAFodHRwczovL21haGFyYXNodHJhdGltZXMuY29tL21haGFyYXNodHJhL211bWJhaS1uZXdzL3Byb3ZpZGUtaW5mb3JtYXRpb24tYWJvdXQtcmVudGluZy1hLWZsYXQtc2F5cy1tdW1iYWktcG9saWNlLW9yZGVycy9hcnRpY2xlc2hvdy85NTE1NTE4Ny5jbXPSAQA?oc=5
