खूशखबर! मुंबईत घर घेऊ इच्छुकांसाठी आनंदाची बातमी, सिडकोकडून लॉटरी, कमी किंमतीत चांगली घरं – News18 लोकमत

नवी मुंबई, 30 ऑगस्ट : मुंबई शहरात आपलं हक्काचं घर असावं, असं प्रत्येकाची इच्छा असते. मुंबईत राज्य आणि देशभरातील लाखो नागरीक आपलं नशीब आजमवण्यासाठी येतात. झोकून देवून काम करणाऱ्यांना ही मुंबई आपलंसं करते. कारण मुंबई त्यासाठीच ओळखली जाते. या मुंबईत तुम्ही स्थिर स्थावर झाले असाल, आणि आपल्या डोक्यावर एका हक्काच्या छप्परचा शोध घेत असाल तर तुमच्यासाठी आनंदाची बातमी आहे. तुम्ही आता योग्य दरात नवी मुंबईत स्वत:चं हक्काचं घर विकत घेऊ शकता. कारण सिडकोकडून घरं, व्यावसायिक दुकानं आणि भूखंडांची लॉटरी जाहीर करण्यात आली आहे. विशेष म्हणजे सध्या गणेशोत्सावाचा राज्यभराच उत्साह आहे. त्यामुळे ज्या मुंबईकरांना स्वत:च्या हक्काचं घर घेवून श्रीगणेशा करायची आहे, त्यांच्यासाठी ही चांगली संधी आहे.

गणेश उत्साहाच्या मुहूर्तावर सिडकोने घरांसाठी सोडत जाहीर केली आहे. सदनिका, व्यावसायिक गाळे आणि भूखंड अशी मेगा लॉटरीसाठी सोडत जाहीर करण्यात आली आहे. यामध्ये 4158 घरं, 245 दुकानं आणि सहा मोठ्या भूखंडांचा देखील समावेश आहे. सिडकोने कार्यालयीन कामकाजासाठी भूखंड जारी केला आहे. यासाठी उद्या ऑनलाईन जाहीरात प्रसिद्ध होणार आहे. तर गुरुवारपासून ग्राहकांना अर्ज करता येतील.

(महाराष्ट्र शासनाचा अजब कारभार, गरजू लाभार्थी वंचित आणि काहींना डबल दिले 50 हजार)

दिवाळीत म्हाडाकडूनही लॉटरी निघणार

दरम्यान, यंदा दिवाळीत मुंबईमध्ये सुमारे चार हजार घरांची सोडत काढण्याचा निर्णय म्हाडा प्राधिकरणानं घेतला आहे. त्यासाठीची तयारीदेखील म्हाडानं सुरू केली आहे. म्हाडातर्फे या लॉटरीची अधिकृत घोषणा अद्याप झाली नसली, तरी लवकरच ती होण्याची शक्यता आहे. त्यामुळं मुंबईकरांना आपल्या हक्काचं घर खरेदी करण्याची संधी मिळणार आहे. महिन्याभरात याविषयीची जाहिरात प्रसिद्ध होऊ शकते. या लॉटरीत पहाडी, गोरेगाव येथील 3,015 घरांपैकी अल्प आणि अत्यल्प गटातील 2,683 घरांचा समावेश असण्याची शक्यता आहे. तसेच कोळे-कल्याण, अ‍ॅन्टॉप हिल, विक्रोळी इत्यादी ठिकाणच्या घरांचाही समावेश असणार आहे.

Published by:Chetan Patil

First published: August 30, 2022, 20:35 IST