गणेशोत्सवात करा जीवाची मुंबई! बेस्टच्या नीलांबरीतून ऐतिहासिक स्थळांची सफर करा – Maharashtra Times

म. टा. प्रतिनिधी, मुंबईः गणेशोत्सवकाळात भाविकांच्या सोयीसाठी बेस्टने गेटवे ऑफ इंडिया ते गिरगाव चौपाटीदरम्यान ‘नीलांबरी’ बससेवा सुरू करण्याचा निर्णय घेतला आहे. या डबल डेकर बस ओपन डेक आहेत. मुंबईकर आणि पर्यटकांना मुंबईतील ऐतिहासिक आणि पर्यटनस्थळांचा आनंद या बसद्वारे लुटता येणार आहे. बसचे भाडे ओपन डेकच्या वरच्या भागासाठी १५० रुपये आणि खालच्या भागासाठी ७५ रुपये असेल. (Ganeshotsav 2022)

गणेशोत्सवादरम्यान ही बससेवा रात्री १० ते सकाळी ६ या वेळेत चालवण्यात येणार आहे. दर तासाला एक बस असेल. छत्रपती शिवाजी महाराज वस्तुसंग्रहालयापासून ती सुरू होईल आणि त्याच मार्गाने गेटवे ऑफ इंडिया, नरिमन पॉइंट, मरिन ड्राइव्ह, चर्चगेट, गिरगाव चौपाटी, गिरगाव चर्च, प्रार्थना समाज, ताडदेव, मुंबई सेंट्रल, भायखळा, जिजामाता उद्यान आणि लालबागमार्गे संग्रहालयाकडे परत येईल.

करोनाच्या संकटामुळे दोन वर्षांनंतर गणेशोत्सव धुमधडाक्यात साजरा केला जात आहे. शिक्षण विभागाने गणपतीनिमित्त शाळा आणि महाविद्यालयांना ३१ ऑगस्ट ते ४ सप्टेंबर यादरम्यान पाच दिवस सुट्टी जाहीर केली आहे. त्यामुळे मुले व पर्यटकांना या सेवेचा लाभ घेता येईल, असा विश्वास बेस्टने व्यक्त केला.