मुंबई बातम्या

नऊ हजारांहून अधिक खड्डे बुजवले; मुंबई महापालिकेचा दावा – Maharashtra Times

म. टा. विशेष प्रतिनिधी, मुंबई

गेल्या काही दिवसांपासून कोसळत असलेल्या मुसळधार पावसामुळे मुंबईत रस्त्यांची अक्षरशः चाळण झाली असून रस्त्यावरून चालताना कसरत करावी लागत आहे. मालाड, परळ, प्रभादेवी, एलफिन्स्टन, मानखुर्द या भागांत खड्ड्यांची संख्या मोठी आहे. मात्र मुंबईत आतापर्यंत सर्वाधिक म्हणजे ९०४ खड्डे अंधेरी के-पश्चिम भागात बुजवण्यात आले. त्यापाठोपाठ अंधेरी पूर्व भागात ७८७ खड्डे बुजवण्यात आले. ९ जुलैपर्यंत नऊ हजारांहून अधिक खड्डे बुजवले गेले, असा दावा मुंबई पालिकेने केला आहे.

शहर व उपनगरात अनेक ठिकाणी रस्त्यांवर खड्डे पडल्याने मुंबईकरांना वाहतूककोंडीला सामोरे जावे लागत आहे. रस्तेबांधणीवर कोट्यवधी रुपये खर्च केला जात असतानाही खड्डे कसे पडतात, असा प्रश्न मुंबईकरांकडून विचारला जात आहे. पावसात पडलेले हे खड्डे बुजवण्यासाठी पालिकेकडून ‘कोल्डमिक्स’चा वापर करण्यात येतो. प्रभाग कार्यालयांच्या मागणीनुसार वरळी येथील प्लाण्टमधून साहित्याचा पुरवठा केला जात आहे.

पालिकेने ९ जुलैपर्यंत नऊ हजार ४५ खड्डे बुजवल्याचा दावा केला. त्यामध्ये ‘कोल्डमिक्स’चा वापर करून बुजवण्यात आलेल्या खड्ड्यांची संख्या ८ हजार ३६६ इतकी आहे. कंत्राटदारांच्या एजन्सीमार्फत २३१, तर पालिका मुख्यालयामार्फत ४४८ खड्डे बुजवण्यात आले. सर्वाधिक म्हणजे ९०४ खड्डे अंधेरी पश्चिम भागात बुजवण्यात आले. या ठिकाणी नऊ हजार ४०० मेट्रिक टन ‘कोल्डमिक्स’ वापरण्यात आले, तर एक हजार ७९६ चौरस मीटर रस्त्याचे क्षेत्र पूर्ववत करण्यात आले. मुंबईतील कुलाबा-ए, मालाड-पी उत्तर, मानखुर्द-एम पश्चिम, दहिसर-आर उत्तर या विभागांत सर्वाधिक १०० टक्के ‘कोल्डमिक्स’ खड्डे बुजवण्यासाठी वापरण्यात आले आहे. पावसामुळे अनेक ठिकाणी खड्ड्यांचे साम्राज्य निर्माण झाले आहे. त्यामुळे खड्डे बुजवण्यासाठी ‘कोल्डमिक्स’च्या मागणीतही वाढ होत आहे.

विभाग आणि खड्डे

अंधेरी के पूर्व – ७८७

अंधेरी के पश्चिम – ९०४

मालाड पी उत्तर – ७६३

चेंबूर एम पूर्व – ६३९

गोरेगाव पी दक्षिण – ६८४

परळ एफ दक्षिण – ५२५

वरळी जी दक्षिण – ४८४

येथे करा तक्रारी

MyBMCpotholefixit ॲप

आपत्ती व्यवस्थापन कक्ष १९१६

सर्व विभाग कार्यालयांतील नागरी सुविधा केंद्रे

सर्व २४ विभाग कार्यालयांत लेखी तक्रारी देणे

टोल फ्री क्रमांक : १८००२२१२९३

ट्विटर: @mybmcroads

बीएमसी व्हॉट्सॲप चॅटबॉट क्रमांक : ९१-८९९९-२२-८९९९

Source: https://maharashtratimes.com/maharashtra/mumbai-news/more-than-9000-potholes-filled-in-roads-in-mumbai/articleshow/92839572.cms