म. टा. विशेष प्रतिनिधी, मुंबई
‘त्या ट्वीटमध्ये कोणाच्याही नावाचा स्पष्ट उल्लेख नाही. असे असताना, एक तरुण विद्यार्थी एक महिन्यापासून गजाआड आहे. हे बरोबर नाही. असे करून तुम्ही देशात दुसऱ्या क्रमांकाचा नागरी पुरस्कार मिळालेल्या व्यक्तीचीच (शरद पवार) एकप्रकारे प्रतिष्ठा कमी करत आहात’, अशा शब्दांत मुंबई हायकोर्टाने सोमवारी पोलिसांना चपराक लगावली. त्याचवेळी ‘आरोपी विद्यार्थ्याची तात्काळ जामिनावर सुटका करण्यास हरकत नसल्याचे निवेदन राज्य सरकारकडून न्यायालयात झाले, तरच राज्याची प्रतिष्ठाही कायम राहील’, असे मत नोंदवून कोर्टाने आज, मंगळवारी दुपारी सरकार व पोलिसांना भूमिका स्पष्ट करण्याचे तोंडी निर्देश दिले. (from the action taken against the offensive tweet against sharad pawar mumbai high court slams police)
राष्ट्रवादी काँग्रेसचे अध्यक्ष शरद पवार यांच्याविषयी आक्षेपार्ह ट्वीट पोस्ट केल्याबद्दल फार्मसीच्या अंतिम वर्षाचा विद्यार्थी असलेला निखिल (वय २२) याच्याविरोधात १३ मे रोजी पहिला एफआयआर नोंदवण्यात आला होता. त्यानंतर अनेकांच्या तक्रारींवरून त्याच्याविरोधात आणखी पाच पोलिस ठाण्यांत एफआयआर दाखल झाले. १४ मे रोजी अटक झाल्यानंतर निखिलला कनिष्ठ कोर्टांकडून जामीनही मिळू शकला नव्हता. त्यामुळे त्याने सर्व एफआयआरच्या वैधतेलाच आव्हान देणारी फौजदारी रिट याचिका अॅड. सुभाष झा यांच्यामार्फत केली आहे.
क्लिक करा आणि वाचा- पंतप्रधान नरेंद्र मोदी महाराष्ट्रात, पुणे मुंबईतील कार्यक्रमांना हजेरी, जाणून घ्या कसा असेल दौरा?
ज्या एका ट्वीटच्या आधारावर तब्बल सहा एफआयआर दाखल झाले ते झा यांनी निदर्शनास आणल्यानंतर न्या. संभाजी शिंदे व न्या. मिलिंद जाधव यांच्या खंडपीठाने तीव्र आश्चर्य व्यक्त केले. ‘या ट्वीटमध्ये तर कोणाच्याही नावाचा स्पष्ट उल्लेखच नाही. तरीही तरुण विद्यार्थी एक महिन्यापासून गजाआड आहे. तुम्ही (पोलिस) अशाप्रकारे कारवाई करायला लागलात, तर नाहक देशातील दुसऱ्या क्रमांकाचा सर्वोच्च नागरी पुरस्कार मिळालेल्या व्यक्तीचीच (शरद पवार) प्रतिष्ठा कमी होईल’, असे खंडपीठाने वारंवार नमूद केले. तेव्हा, ‘पवार यांचे नाव तर सध्या राष्ट्रपती पदाच्या निवडणुकीबाबतही चर्चेत आहे’, असे झा यांनी कोर्टाच्या निदर्शनास आणले. ‘सरकारी प्रशासनातील वरिष्ठ अधिकाऱ्यांनाही कदाचित पोलिसांकडून काय सुरू आहे याची कल्पना नसावी. दररोज हजारो ट्वीट होत असतात. अनावश्यक बदनामी करणाऱ्यांबाबत योग्य ती कायदेशीर कार्यवाही करणे बरोबर आहे. परंतु, अशाप्रकारे नव्हे. या ट्वीटमध्ये व्यक्तीच्या नावाचा स्पष्ट उल्लेखही नाही’, असे खंडपीठाने निदर्शनास आणले. तेव्हा ‘आरोपी तरुणाची पार्श्वभूमीही योग्य नाही, हे तपासात समोर आले आहे. हवे तर पोलिस तपासातील तपशील कोर्टाने पाहावेत’, असा बचाव मुख्य सरकारी वकील अरुणा पै यांनी केला. मात्र, ‘सध्याच्या घडीला आमच्यासाठी एफआयआरचा आधार असलेले ट्वीटच महत्त्वाचे आहे. त्यामुळे आरोपीची जामिनावर तात्काळ सुटका होण्यास हरकत नाही, असे निवेदन सरकारी पक्षातर्फे होणे अपेक्षित आहे. तरच राज्याच्या प्रतिमेला धक्का पोचणार नाही. राज्याच्या गृह सचिवांशी सल्लामसलत करून मंगळवारी (आज) दुपारी २.३० वाजता भूमिका स्पष्ट करा’, असे तोंडी निर्देश खंडपीठाने पै यांना दिले.
क्लिक करा आणि वाचा- महाराष्ट्रात मान्सूनची स्लो बॅटिंग, यलो अलर्ट जारी, मुंबईत समुद्राला मोठी भरती, सतर्कतेचा इशारा
काय होते ट्विट?
‘वेळ आली आहे, बारामतीच्या गांधीसाठी… बारामतीचा नथुराम गोडसे तयार करायची…’ असे ट्विट निखिल भामरेने केले होते. त्यानंतर ठाण्यातील नौपाडा पोलिस ठाण्यात राष्ट्रवादीचे आनंद परांजपे यांच्या तक्रारीवरून पहिला एफआयआर दाखल झाला. ‘या ट्विटमध्ये आमचे राष्ट्रवादी पक्षाचे अध्यक्ष श्री. शरदचंद्रजी पवार साहेब यांना बारामतीचा गांधी संबोधून त्यांना संपवण्याच्या आशयाची धमकी दिली आहे’, असे परांजपे यांच्या फिर्यादीत नमूद आहे.
क्लिक करा आणि वाचा- राऊतांच्या खांद्यावरचा विजयाचा गुलाल निघाला नाही तोच सोमय्यांची निवडणूक आयोगाकडे तक्रार
केतकीच्या याचिकेवर गुरुवारी सुनावणी
शरद पवार यांच्याविषयीची आक्षेपार्ह पोस्ट सोशल मीडियावर पोस्ट केल्याप्रकरणी अभिनेत्री केतकी चितळे ही सुद्धा १५ मेपासून अटकेत आहे. केतकीविरोधात तक्रारींच्या आधारे राज्यभरात एकूण २२ एफआयआर व चार अदखलपात्र तक्रारी दाखल झाल्या असल्याची माहिती अरुणा पै यांनी खंडपीठाला दिली. त्यानंतर केतकीचे वकील अॅड. घनश्याम उपाध्याय यांना आवश्यक असलेल्या प्रती उपलब्ध करण्याची सूचना पै यांना करून खंडपीठाने केतकीच्या याचिकेवर १६ जून रोजी सुनावली ठेवली.
Source: https://maharashtratimes.com/maharashtra/mumbai-news/from-the-action-taken-against-the-offensive-tweet-against-sharad-pawar-mumbai-high-court-slams-police/articleshow/92190451.cms
