मुंबई बातम्या

बेकायदेशीर ड्रोन आयातीचे मुंबई-गोवा कनेक्शन उघड ;डीआरआयकडून ३८ ड्रोन जप्त – Maharashtra Times

म. टा. खास प्रतिनिधी,मुंबई

‘ड्रोन’ची (चालकरहित विमाने) देशात होणारी बेकायदेशीर आयात महसूल गुप्तचर संचालनालयाने (डीआरआय) उघड केली आहे. या आयातीचा मुंबई व गोवा, असा संबंध असल्याचे समोर आले असून त्याअंतर्गत ही कारवाई करण्यात आली आहे. या प्रकरणी पाच जणांना अटक करण्यात झाली आहे.

डीआरआय, मुंबईच्या समन्वयाने डीआरआयने गोव्यातील पणजी विमानतळावर ही कारवाई केली. त्यामध्ये तब्बल ३८ उत्तम दर्जाची ड्रोन विमाने ताब्यात घेण्यात आली. ही विमाने शारजा येथून पणजीत छुप्या मार्गाने आणली जात होती. पणजीत आणल्यानंतर ती मुंबईला धाडली जाणार होती. मुंबईहून देशाच्या विविध भागात त्याचे वितरण करण्याची योजना होती, असे डीआरआयच्या तपासात समोर आले. त्यानुसार डीआरआयने या सर्व तस्करीचा माग काढला. त्यामध्ये मुंबई व बिहार येथून पाच तस्करांना अटक करण्यात आली. अशाप्रकारे छुप्या मार्गाने ड्रोन का आणले जात होते, याचे नेमके कारण अद्याप कळलेले नाही. परंतु डीआरआयकडून यासंबंधी कसून शोध सुरू आहे.

दरम्यान काही दिवसांपूर्वी चीनमधील कंपन्यांनी तब्बल १२०० बेनामी ‘ड्रोन’ मुंबईत पाठवल्याची घटनादेखील उघडकीस आली होती. डीआरआय मुंबईने न्हावाशेवा बंदरावर कारवाईद्वारे हे ड्रोन जप्त केले होते. त्यावेळी हे १२०० ड्रोन्स वेगवेगळ्या प्रकारात होते. काही पूर्णपणे तयार होते. काही अर्धवट अवस्थेत होते. काही ड्रोन्सचे केवळ सुटे भाग होते. भारतीय मानके ब्युरोच्या तपासापासून व सीमा शुल्क टाळण्यासाठी हे ड्रोन छुप्या मार्गाने आयात केले असले तरी, त्याचा उपयोग कुठल्यातरी संशोधन व विकासासाठी होणार असल्याचे पुढील तपासात समोर आले आहे. त्यामुळे हे ड्रोन संरक्षणदृष्ट्या धोकादायक तर नाहीत ना, यासाठी आता डीआरआयकडून वेगळ्या पातळीवर तपास सुरू केला होता. तर त्याआधी ‘डीआरआय’ने जून २०१८ मध्ये याच पद्धतीतील ३६ ड्रोन न्हावा शेवाच्या बंदरावरच जप्त केले होते. १४.११ लाख रुपये त्यांची किंमत होती.

Source: https://maharashtratimes.com/maharashtra/mumbai-news/mumbai-goa-connection-of-illegal-drone-imports-exposeddri-seizes-38-drones/articleshow/91113064.cms