मुंबई बातम्या

अॅड. जयश्री पाटील यांनी मुंबई पोलिसांचं संरक्षण सोडलं, शोधासाठी पोलिसांची पथकं – ABP Majha

मुंबई : अॅड. जयश्री पाटील यांनी मुंबई पोलिसांनी दिलेलं संरक्षण सोडलं आहे. राष्ट्रवादी काँग्रेसचे अध्यक्ष शरद पवार यांच्या घरावरील हल्ल्याप्रकरणी मुंबईच्या गावदेवी पोलिसांनी एसटी कर्मचाऱ्यांचे वकील गुणरत्न सदावर्ते यांना 8 एप्रिल रोजी अटक केली होती. त्यानंतर दुसऱ्या दिवसापासून म्हणजेच 9 एप्रिलपासून जयश्री पाटील यांनी पोलीस संरक्षण सोडलं.

पत्नी जयश्री पाटील या मुंबई हायकोर्टात वकील आहेत. सूत्रांच्या माहितीनुसार, अॅड. जयश्री पाटील यांचे पती अॅड. गुणरत्न सदावर्ते यांना अटक केल्यानंतर दुसऱ्याच दिवशी कोर्टात गेल्या तेव्हा त्या पोलीस संरक्षणाशिवाय होत्या. आपले संरक्षण सुरक्षित नाही अशी शंका आल्याने त्या त्यांना टाळू लागल्या.

शरद पवार यांच्या दक्षिण मुंबईतील सिल्वर ओक या घरावरील हल्ल्याप्रकरणी वकील गुणरत्न सदावर्ते यांच्या पत्नी जयश्री पाटील यांनाही आरोपी करण्यात आलं आहे. गावदेवी पोलीस स्टेशनमध्ये त्यांच्याविरोधात गुन्हा दाखल करण्यात आला असून त्यांना वॉण्टेड दाखवण्यात आलं आहे. जयश्री पाटील यांनीच हे आंदोलन करण्यास सांगितलं, अशी धक्कादायक बाब पोलीस तपासात उघड झाली आहे.

गावदेवी पोलिसांनी बुधवारी (13 एप्रिल) संध्याकाळी एफआयआरमध्ये त्यांचं नाव आरोपी म्हणून जोडलं. त्यानंतर जयश्री पाटील यांनी आपला मोबाईल फोन बंद केला असून त्या नॉटरिचेबल आहेत. त्यांचा शोध घेण्यासाठी पोलिसांची पथकं रवाना करण्यात आली आहेत.

शरद पवार यांच्या घरावरील हल्ल्याप्रकरणी आधीच अ‍ॅड. गुणरत्न सदावर्ते यांना अटक करण्यात आली असून ते सध्या पोलीस कोठडीत आहेत. त्यांच्यानंतर आता त्यांची पत्नी अ‍ॅड. जयश्री पाटील यासुद्धा अडचणीत आल्या आहेत.

शरद पवारांच्या घरावर हल्ला
एसटी कर्मचाऱ्यांन 8 एप्रिल रोजी शरद पवार यांच्या घरावर अचानक धडक दिली होती. हिंसक जमावाने गेटमधून आत घुसत दगडफेक आणि चप्पलफेक केली. हल्ला झाला त्यावेळी सुरक्षाव्यवस्था फारशी नव्हती. परंतु अतिरिक्त कुमक आल्यानंतर पोलिसांनी आंदोलकांना ताब्यात घेतलं आणि मोठा अनर्थ टळला होता. या प्रकरणी पोलिसांचा तपास सुरु आहे. एसटी कामगारांची बाजू कोर्टात मांडणारे वकील गुणरत्न सदावर्ते यांच्या अटकेनंतर अनेक महत्त्वाचे धागेदोरे पोलिसांच्या हाती लागले आहेत. 

Source: https://marathi.abplive.com/news/mumbai/adv-jayashree-patil-dropped-the-protection-given-by-mumbai-police-1050621