पुणे : मुंबई इंडियन्सच्या संघाला आरसीबीकडून पराभव पत्करावा लागला. मुंबईसाठी हा सलग चौथा पराभव ठरला. पण या पराभवानंतरही मुंबईच्या संघासाठी एक आनंदाची बातमी आली आहे.
सामन्यानंतर असं नेमकं घडलं तरी काय, पाहा…
मुंबई इंडियन्सना आजच्या सामन्यात सलग चौथा पराभव पत्करावा लागला. मुंबई इंडियन्स आणि चेन्नई सुपर किंग्स यांची गाडी सध्याच्या घडीला एकाच गिअरवर चालल्याचे पाहायला मिळत आहे. कारण दोन्ही संघांचे चार पराभव झाले आहेत. आजच्या पहिल्या सामन्यात हैदराबादने चेन्नईवर विजय साकारला. त्यामुळे गुणतालिकेत मोठा बदल झाला होता. कारण या सामन्यापूर्वी हैदराबादचा संघ हा १०व्या स्थानावर होता. पण या विजयामुळे त्यांनी दोन गुण कमावले आणि मुंबई इंडियन्स व चेन्नईला मागे टाकत त्यांनी गुणतालिकेत आठवे स्थान पटकावले. त्यानंतर चेन्नईचा संघ हा ९व्या स्थानावर स्थिरावला होता आणि मुंबई इंडियन्सच्या संघावर १०व्या स्थानावर पोहोचण्याची नामुष्की ओढवली होती. त्यावेळी मुंबईचे चाहते चेन्नई आणि हैदराबादच्या संघावर भडकले होते. या दोन्ही संघांनी जाणूनबुजून मुंबईला १०व्या स्थानावर पोहोचवण्यसाठी रणनिती आखली, अशी चर्चा सुरु झाली होती. पण मुंबई इंडियन्सचा सामना संपला आणि सर्वांनाच मोठा धक्का बसला. मुंबई इंडियन्स आणि त्यांच्या चाहत्यांसाी यावेळी आनंदाची बातमी आली होती. कारण या सामन्यापूर्वी मुंबई आणि चेन्नई यांच्या नावावर एकही गुण जमा नव्हता. पण त्यावेळी मुंबईचा रनरेट हा -१.३६२ असा होता, तर चेन्नईचा रनरेट मुंबईपेक्षा चांगला म्हणजेच -१.२११ असा होता. पण सामना संपल्यावर सर्वांनाच धक्का बसला. कारण मुंबईचा रनरेट हा -१.१८१ असा झाला होता. मुंबई इंडियन्सचा हा रनरेट चेन्नईपेक्षा उजवा होता. त्यामुळे मुंबई इंडियन्सचा संघ ९व्या स्थानावर पुढे सरकला तर चेन्नईची १०व्या स्थानावर घसरण झाली. या सामन्यात मुंबईला पराभव पत्करावा लागला असला तरी ते १०व्या स्थानावरून नवव्या स्थानावर पोहोचले आहेत आणि हीच त्यांच्यासाठी आनंदाची बातमी ठरू शकते.
Source: https://maharashtratimes.com/sports/cricket/iplt22/news/mumbai-indians-get-good-news-after-defeat-from-rcb-in-ipl-2022-know-what-happened-exactly/articleshow/90752222.cms
